Sarkin Dokin Kara Bana Ya Gamu Da Fushin Hukuma A Kano

51

Daga Na’ima Abubakar, Kano

Kamar yadda ya zama al’ada a duk shekara, matasa kan shirya wani kwarya-kwaryar Hawa amma na dokin Kara, Matasa a unguwar Fagge na cikin sahun matasan da kan yi irin wannan hawa a duk bayan sallah, idan Mai martaba Sarkin Kano ya kammala hawan Sallah. Su kuma irin wadannan matasa kan shirya nasu hawan domin nishadantar da al’ummar unguwannin su.

Wannan shekara Sarkin Dokin karan da aka fi sani da Sarki Jamilu ya fuskanci fushin hukuma alokacin da suka kammala shirin fita wannan hawa.

Kamar yadda aka saba ana taruwa a Masallacin waje inda anan ne sarkin ke karbar gaisuwar hakimansa, daga nan kuma sai a zagaya cikin unguwar Fagge inda ake gaisawa da jama’a, kuma Sarkin na tsayawa a wurare daban-daban idan jama’a ke yin gaisuwa harma ana yin addu’a. A ranar Asabar data gabata Sarki Jamilu da tawagar hakimansa suka  isa harabar Masallachin na Waje, daga nan ne kuma  sai jami’an tsaro suka zo  suka umarci sarki da ya kwance rawaninsa, Shi kuma Sarki Jamilu ya basu amsa da cewar Sarki baya kwance rawaninsa a titi, sai dai sarkin ya yiwa Jami’an tsaron alkawarin cewa daga na gida suka nufa.

Sarki Jamilu ya ci gaba da cewa daga nan ne kuma sai jami’an tsaron suka fara harbi sama, jama’a suka fara tsere, nima a raina har na yanke shawara guduwa sai na tuna sarki baya guda, guda sai kare sai doki, saboda haka nan na tsaya suka zo da mota suka ce ranka ya dade shiga na ce masu to na shiga matar tasu, domin ba gudu ba ja da baya, gara a matsayina na shugaba na tsaya duk abinda  zai sa me ni ya sa me ni maimakon jama’ata domin duk wanda ya zo wurin nan don mu yazo. Haka dai sarki Jamilu ya kwashe kwana guda a hannun jami’an tsaro sanann aka sako shi.

Tun kafi faruwa wannan al’amari rundunar ‘yan sandan Jihar Kano ta bayar da sanarwa hana duk wani taron al’umma wanda bata tabbatar da sahihancinsa ba domin kaucewa tashin tashina, kamar yadda kakakin rundunanr ‘yan Sandan Jihar Kano DSP Magaji Musa  Majiyar ya ambata.

 

LEAVE A REPLY

Please enter your comment!
Please enter your name here