Hoton dan takarar shugaban kasa a jam’iyyar PDP, Alhaji Atiku Abubakar, yayi batan dabo a hotunan motocin jam’iyyar da aka bayyana don fara yakin neman zaben jam’iyyar a 2023 a jihar Ribas.
Motocin, wadanda adadinsu ya kai kusan 25, an kaddamar da su ne a ranar Litinin, 24 ga watan Oktoba, 2022, a sakatariyar ofishin yakin neman zaben jam’iyyar, dake kan titin Woji a GRA, a Fatakwal.
Kwamitin yakin neman zaben mai suna “New Rivers Vision Consolidation Project” ta nada tsohon shugaban jam’iyyar PDP a jihar, Cif Felix Obuah a matsayin babban darakta yayin da Gwamna Nyesom Ezenwo Wike yake shugabantar kwamitin.
Ku tuna cewa Wike, tare da wasu gwamnonin da suka hada da Gwamna Okezie Ikpeazu (Abia), Samuel Ortom (Benue), Ifeanyi Ugwuanyi (Enugu) da Seyi Makinde (Oyo), suna ta fafatawa da shugabannin PDP na kasa kan zargin su da badakalar kudade a ofishin Sanata Iyorchia Ayu dake shugabantar jam’iyyar.
Gwamnonin PDP na G-5 sun kafa sharadin maye gurbin Ayu kadin su goyi bayan dan takarar shugaban kasa na jam’iyyar, Atiku Abubakar, a zaben shugaban kasa na 2023.
