Daga Rabiu Ali Indabawa,
An gano wani da ake zargi da garkuwar, satar mutane da kuma yin tsafi a cikin wani rami a yankin Sari-Iganmu da ke Legas, a kan babbar hanyar Orile-Badagry. Sassan jiki da kayan hade-hade kamar kayan makaranta, karama safa, damara da sauransu, an ruwaito cewa an same su a cikin wani kogo. Ramin yana gaban Makarantar Sakandaren Araromi, wata makaranta dake tsakiyar unguwa a cikin jama’a.
Rahotanni na nuni da cewa mutum biyun da aka kama a cikin ramin sun kone kurmus yayin da aka ce an mika wasu biyu zuwa ofishin ‘yan sanda na Orile-Iganmu. Wasu majiyoyi daga yankin, sun ba da haske kan yadda aka gano wurin, suna cewa wata yarinya mai sayar da burodi tana ta shawagi a kan babbar hanyar da misalin karfe 5 na yamma a ranar Lahadi lokacin da ta hango wasu maza suna yawo da zarto a cikin ramin.
An ce yarinyar ce ta yi kururuwar da ta sanya matasa suka shiga wurin.
Bayanai sun kara da cewa, wasu mambobin kungiyar ‘Odudua Peoples Congress,’ sun shiga bincike kan lamarin inda suka tarar da wasu gine-gine dauke da katifu da talabijin. An ce mambobin OPC din suna zargin cewa a duk lokacin da suke bin barayi da yamma daga tashar motar Alafia da ke kan babbar hanyar, wadanda ake zargin za su bace a cikin ramin.
An gano cewa mazaunan sun ci gaba da bincike a rami a ranar kuma sun sake kama wasu mutum biyu da ake zargi – wani saurayi da dattijo – yayin da aka gano sassan jikin mutum a wurin.
“Sun banka wa matashin wuta suka ceci wannan dattijo, wanda suke ganin zai ita fadar abin da ke faruwa a wurin. An mik shi ga jami’an hukumar kula da makwabta ta jihar Legas. Sun samu Naira 17,00 a dunkule a wurinsa daga nan suka tafi da shi ofishin ‘yan sanda. An samu sassan jikin da kuma kawunan mutane a cikin ramin. ” In ji wata majiya.
