Dan gwagwarmayar siyasar nan kuma tsohon dan takarar shugaban kasa, Mista Omoyele Sowore dai ya fuskaci fushin jami’an tsaro a jajibiren sabuwar shekara inda suka cafke shi a Abuja bisa jagorantar zanga-zangar cikin dare domin kalubalantar gwamnatin tarayya.
Sowore dai shi ne mawallafin kayar hada labarai ta Sahara Reporters, jami’an ‘yan sanda ne suka kama shi bisa jagorantar zanga-zanga a birnin tarayya Abuja bisa kiran samar da rayuwa mai inganci ga ‘yan kasa.
An kira layukan Sowore a safiyar jiya Juma’a amma dukkanin layukansa biyun ba su shiga. Har dai zuwa yanzu ba a samu adadin yawan wadanda aka kama su tare da Sowore din ba.
Har zuwa lokacin hada wannan labarin ba a jiyo komai daga bakin jami’in watsa labarai na ‘yan sanda Mista Frank Mba ba.
Kamun na Sowore dai ya zo ne kwana guda bayan da ya yi shelar neman jama’a da su zo su mara masa baya wajen jagorantar gangamin suka da salon mulkin gwamnati mai ci a wani sakon da ya aike a shafinsa na Twitter Handle.
Zanga-zangar dai wacce suka fito da ita, da bukatu daban-daban dukka dai da suke nuna rashin gamsuwa da salon mulkin gwamnatin Buhari. Sun fara ne da karfe 11:30 na daren kashegarin sabowar shekara da zimmar za su cigaba da zanga-zangar har zuwa jiya farkon sabuwar shekara.
Sowore ya bukaci masu shiga zanga-zangar da su fito da ababen da za su nuna kiranye-kiranyen da suke da su domin bukatar samar da sauyi da canji.
‘Yan sanda sun tarwatsa zanga-zangar a yankin Gudu da ke Abuja, inda suka kamu wasu daga cikin masu zanga-zangar.
Wanda har zuwa aiko da labarin nan su na karkashin kulawar ‘yan sandan.
Zanga-zangar mai neman samar da rayuwa mai inganci da kuma neman inganta aikin tsaro tare da sukar gwamnatin Buhari bisa gazawa.
Tunin dai wasu kungiyoyi suka fara kiran a sake Sowore.
Idan za ku iya tunawa dai a farko an taba tsare Mista Sowore na tsawon sama da kwanaki 100 a shekarar 2019 bisa zanga-zangar neman ‘Rabalushin’ da ya yi jagoranta, wanda daga bisa kotu ta bada belinsa.
