Daga Mahdi M. Muhammad,
Bankin TAJBank wanda ake ganin a yanzu ya fi kowane Banki kirkiro sabbin abubuwan cigaba a Nijeriya, ya sake jaddada kudurinsa na bada gudumawa ga ci gaba da bunkasa bangaren ilimi a duk fadin Nijeriya.
Wannan ya fito fili ne a yayin kaddamar da sabbin kayan aiki a makarantar ‘Saint John Paul’, da ke jihar Akwa Ibom, tare da manyan mutane da dama da suka halarci taron, kamar su Sanata Godswill Akpabio, Ministan harkokin Neja-Delta, Shugabar makarantar, misis Uloma Akpabio, Mai gudanarwa na NDDC, Akwa Efiong da sauran manyan baki.
Kamar yadda ya ke kunshe cikin wata sanarwa da babbar jami’ar yada labaran bankin, Maryam Ehichioya ta sanya wa hannu, Babban bako na musamman a wurin bikin, shi ne Ministan harkokin Neja-Delta, Sanata Godswill Akpabio, inda ya yaba wa Bankin don nuna hangen nesa ga harkokin ilimi da kuma yarda da samar da kudade don fadada ayyukan cibiyar. Wannan, in ji shi, wata manuniya ce da ke nuna bankin na ba da hadin gwiwa da sahihan hukumomi a kokarin sa na bayar da gudumawa ga gagarumin ci gaban bangaren ilimin kasar nan.
Sanata Akpabio ya kuma bukaci Bankin da ya bude reshe a Uyo a matsayin fifiko da zarar ya samu lasisin sa na kasa.
Wanda ya wakilci Bankin a wannan taron, Mista Nasir .T. Usman ya yarda da gagarumin ci gaban da shugabancin makarantar ‘Saint John Paul’ na Akwa Ibom ya yi don cike gibin ilimi mai inganci a Nijeriya ta hanyar la’akari da muhimman abubuwan da suka shafi fahimtar irin wannan bukatar ta wadatar jama’a. Ya kuma ce, sakamakon ya kasance bayyananne a cikin shekaru tara na makarantar, kasancewar ta yi nasarar kirkirar dalibai hazikai masu hazakar ilimi da matsayi mai kyau.
Ya ci gaba da bayyana cewa a cikin sama da shekara guda na fara aiki, TAJBank ya yi nasara a manyan lamura da dama. ya ce, Kwanan nan Kamfanin Jaridar LEADERSHIP ya ba Bankin lambar girmamawa a matsayin Bankin Shekarar 2020, bisa la’akari da kwazon sa da kokarin sa na shigar da kudi ga mutane daga tushe.
Ya ce, TAJBank yana ba da samfuran ayyukan hulda ga abokan cinikinsa. Wasu daga cikin wadannan kayayyakin sun hada da, Abokin Hulda (Mudarabah) Adadin Lokaci, Hayar (Ijarah) Kudi, Abokin Hulda (Mudarabah) Ajiye ko kuma Asusun Yanzu, da dai sauran su.
Bugu da kari, TAJBank shi ne Banki na biyu a Nijeriya da ke ba da bashi ba tare da ruwa ba. Bankin ya sami lasisi daga Babban bankin Nijeriya a ranar 12 ga watan Yulin 2019. Haka zalika, Bankin yana ba da kaya da ayyuka masu ban sha’awa, wadanda suka hada da Bankin kamfanoni masu zaman kansu, Kasuwancin banki, bankin Kasuwanci, raya ayyuka ci gaba da na jama’a.
