An ruwaito cewa, daruruwan ‘yan bindiga sun hadu da fishin jami’an soji da ke samar da tsaro a yankin Allawa da ke cikin karamar hukumar Shiroro cikin jihar Neja.
Lamarin ya afku ne a makon da ya gabata bayan da masu garkuwa da mutanen suka fara aiken wadanda suka sace ya sawo masu man Fetur, inda shi kuma akan hanyar zuwa aiken, ya sanar da sojin maboyar masu garkuwar don su kai dauki.
An ruwaito cewa, mutum hudu ne masu garkuwar suka sace a wannan makon da ya gabata a lokacin suna tsaka da aiki a gonakansu, inda masu sace mutanen, suka aiki daya daga cikin wadanda suka sace zuwa cikin yankin na Allawa, don ya sayo musu man Fetur da za su zuba a baburansu, daga nan ne dan aiken ya sanar da sojojin maboyar ta masu garkuwar.
Shugaban kungiyar matasa ta Lakpma da ke yankin Jibril Allawa, ya tabbatar da afkuwar lamarin, inda ya ce, bayan da sojojin suka samu bayanan daga gun dan aiken, sun yi gaggawar zuwa maboyar, inda wasu daga cikin wadanda masu garkuwar suka sato, suka kubuta.
An ruwaito cewa, a lokacin musayar wutar a tsakanin masu garkuwar da sojojin, soji uku sun samu rauni.
