Shugaban kasar Nijeriya Muhammadu Buhari ya amince da sake bude iyakokin kasar nan guda hudu nan take ba tare da bata wani lokaci ba, a yayin da kuma ake sauraron bude wasu karin iyakokin nan kusa.
Ministan kudi da kasafi tare da tsare-tsaren tattalin arziki, Misis Zainab Ahmed, ita ce ta shaida hakan ga ‘yan jarida jim kadan bayan kammala ganawar mako-mako na FEC wanda ya gudana a jiya, ta na mai cewa har zuwa yanzu dai kuma ba a dage takunkumi kan shigo da wasu daga cikin kayayyaki ba irin su shinkafa da sauran ababen da ake sarrafawa.
Ganawar wanda ya gudana ta kafar bidiyo, mataimakin shugaban kasa Farfesa Yemi Osinbajo ne ya jagoranta, inda shi kansa shugaban kasa Muhammadu Buhari ya jigo cikin zaman aka dama da shi daga can garin Daura inda ke zaman hutun mako guda.
Ministan ta bayyana cewar iyakokin da aka bude a daidai wannan lokacin sun hada da iyakar Seme da ke shiyyar kudu maso yamma, iyakar Ilela da ke arewa maso yamma, iyakar Mfun da ke kudu maso kudu da kuma iyakar Maigatari da ke shiyyar kudu maso yamma.
Ministan ta ce, “Shugaban kasa Muhammadu Buhari ya amince da shawarar da kwamitin da aka kafa don duba iyuwar sake bude iyakoki ya bayar, wanda ya samu shugabancin Ministan kasuwanci da masana’antu, ministan cikin gida, kula da harkokin kasashen waje, babban mai bada shawara kan harkokin tsaro, kwantilola janar na kwastam da kuma shugaban hukumar kula da shige da fice.
“Kwamitin an daura masa alhakin bibiya da bada shawara ga shugaban kasa kan yiyuwar sake bude iyakokin kasar nan.
“Shugaban ya kuma amince da bude iyakoki guda hudu da suka hada da Seme, Ilela, Maigatari da iyakar Mfum.
“Dukkanin wadannan iyakokin guda hudu an bada umarnin bude su ne nan take, an bada umarnin bude su kafin nan da ranar 31 ga watan Disamba,” ta shaida.
Idan za ku iya tunawa dai a watan Agustan 2019 ne shugaban kasar ya bada umarnin kulle dukkanin iyakokin Nijeriya bisa yawaitar masu fasa gwabrin shigo da kayan abinci da makamai cikin kasar nan.
