Matasan da ke zanga-zangar matsin da tsakar rayuwa sun kutsa kai cikin gidan Gwamnatin jihar Bauchi (masaukin baƙi) da ke garin Azare Shalƙwatar ƙaramar hukumar Katagum, gami da gidan tsohon mataimakin gwamnan jihar Bauchi Sanata Baba Tela inda suka wawushe komai.
Rahotonnin da ke zuwa sun tabbatar da cewa matasan sun shiga wuraren ne a yau Litinin yayin zanga-zangar matsin rayuwa.
- Gwaman Bauchi Ya Karya Farashin Taki Zuwa ₦20,000
- Ba Wanda Zai Yi Zanga-zanga A Bauchi – Muhammad Ibrahim
Da ya ke tabbatar ma wakilinmu abun da ya faru, ganau kuma mazaunin Azare, Lukman Azare ya ce, “Yau mun tashi a Azare babu daɗi domin an tashi da ƙone-ƙone da zanga-zanga.”
“Da ya ke ni ina cikin GRA ne unguwarmu dai sun shiga gidan tsohon mataimakin gwamnan sun farfasa sun kwashe Kujeru da su AC da duk abubuwan amfani, haka ma suka yi a government lodge inda suka wawushe kayan da ke ciki.”
Har-ila-yau, akwai rahotonnnin da ke cewa matasan sun je sakatariyar ƙaramar hukumar Katagum domin zanga-zangar ta su sai dai babu tabbacin irin ɓarnar da aka samu a sakatariyar zuwa yanzu.
