Wasu ‘yan shekaru kadan da basu dade da wucewa ba, kafar watsa labarai ta kasar Amurka mai suna USA Today ta bayyana cewar kashi hamsin cikin dari na mutanen kasar Amurka suna ta kokarin su ga cewar lalle sun samu inganta lafiyar su ta hanyar duk yadda za su iya, ganin sun samu damar rage cin nama da yawa a cikin abincin su. Saboda mutum zai lura da cewar a duk inda zai tarar da ko kuma ya samu dalibai biyar to daya da ga cikinsu ko dai shi vegan ne ko kuma begetarian ko dai yana ta kokarin rage yawan cin nama cikin abincin sa, sai dai yin amfani da kayayyakin abincin da suke ganyaryaki ne.
vegans sune wadanda basu cin duk wani abinda ya fita daga dabba a matsayin abinci ko kuma yin wani amfani da abinda yake nasaba da hakan. Ta wani bangare kuma shi begetarian su kuma mutanen da basu cin nama ne sai dai kayan ganyaryaki da kuma irin su nut ko kuma gyada da dai sauran makamantasu.
Wannan irin tsarin cin abincin ana kiranshi da sunan kayayyakin abinci da ya shafi tsirrai ko ganyaryaki, ko kuma wani tsarin cin abinci na vegan diet. Amma kuma sai dai wani abin tambaya da kuma za a bukaci amsar shi ne, me ya sa su ‘yan kasar ta Amurka da ma sauran wasu sassan na duniya sai ci gaba suke ta famar yi na wani kokari ta wajen rage cin nama cikin abincinsu ne? Ya shi al’amarin labarin ya ke ne a irin kasashen mu na Afirka ko hakan yana faruwa wato ko akwai suma wadanda suke da irin wancan akidar?
An dai dade ana ta samun gardandami da kuma yawan kumfar baki, na cewar da akwai ko kuma babu illar cin nama ga lafiyar dan adama, sai dai kuma da kwai masu ganin cewar akwai illar, sune suka fi danganta laifin ga harkokin kamfanonin sarrafa nama. A yanzu haka tafiyar da ake yi, mutane mutane masu yawa sun yarda lalle cin naman na da illa ga lafiyar dan adam. Wannan bayanin kuma shine dalilin da ya kara ba masu tallata ra’ayin zamantowa vegan karin karfin guiwa da kuma basu wata dama ta kara kaimi wajen wayar da kan da su keyi akan jama’a su bar cin nama. A ganin ‘yan vegan, idan dai har muna son dabbobi, to me zai sa mu ci naman su?
Duk kuwa da yake mun san cewar ta bangaren addini, musamman ma ace na musulunci, Allah ya halattawa mutane cin naman dabbobi daban- daban idan har sun bi ka’idar da addinin ya shinfida masu, to amma a wurin ‘yan vegan ba haka ne, shi al’amarin nasu yake ba. Akwai daliliai wadanda shuka shafi kula da lafiyar jiki, sau da yawa idan aka duba to za a ga cewar bari ko kuma rage cin nama wannan yana da matukar kyau.
Ga dai dalilan wadanda suka kasance kamar haka:
Rage Hadarin Kamuwa Da Cututtukan Da Suka Shafi Zuciya Da Kuma Sikari:
Bincike ya tabbatar da cewar abincin da ake samu a jikin dabbobi wadanda suka kamu da cutar cholesterol mai yawa da kuma irin kayayyakin abincin da suke da sinadarin daya shafi nau’in abinci na fat, ko kuma wadanda suke da kitse da kuma mai, suna gaba-gaba wajen haifar da cututtukan da suka shafi na zuciya. Mutum na iya kare kansa da ga shi wannan hadari ta hanyar cin abinci irin su kayayyakin marmari , ganyaryaki ko kuma su ‘ya’yan itatuwa. Su irin wadannan abincin masu lafiya suna ba mutum high amount of potassium da kuma low fibre wanda hakan zai taimaka wajen rage hadarin kamuwa da ciwon zuciya da kuma ciwon shan inna, wato stroke. Ciwon zuciya da stroke na daga cikin cututtuka da ke kashe mutane masu yawa a wannan halin da muke ciki.
Wani likita a kasar Amurka mai suna Dokta Caldwell Esselstyne ya tabbar da cewar yana taimakawa marasa lafiya, wadanda suke jinya a wurinsa, ta hanyar sa su cin abinci vegan diet kawai. Kuma ya tabbatar da cewar wannan tsarin cin abinci ya taimakawa mutane marasa lafiya daban-daban, wasu daga cikin su ma har an samu yin nasarar warkar da cuta irin ta sikari nau’i na biyu da yake damuwar su.
Kariya Daga Cutar Sankara Wato Kansa Da Ma Wasu Cututtuka Masu Matukar Matsala Na Zamani:
Cin abincin vegan diet na da matukar amfani ga lafiya, domin kuwa cikin nau’oin abincinsu akwai abubuwa wadanda suke kara lafiya da kuma bayar da kariya daga cututtuka masu yawa. Suna da sinadaran da ake kira da suna antiodidants da kuma phytonutrients wadanda ke yaki da samuwar wau kwayoyin halitta da ake kira a kimiyyance da suna free radicals masu haddasa lalacewar kwayoyin halitta na wasu abubuwan da suke jikin dan adam da kuma haifar da inflammation wato matsala wadda ta kan iya shafar lafiyar jiki. Ga kuma lalacewar wasu abubuwa na cikin jiki wanda kan haifar da cututtuka kamar su kansa da kuma wadanda suke alaka dasu. Bugu da kari kuma bincike ya tabbatar da cewar idan mutum ya mai da hankalin shi kan abincin bda ya fi dace da shi, vegan diet zai rage hadarin kamuwa daga hawan jini da yawa da ga cututtuka irinsa.
Hukumar lafiya ta duniya, da aka fi sani da suna World Health Organization, wadda ta tabbatar da cewar naman da ake sarrafawa, wato irin naman da aka sarrafa shi aka sa shi cikin gwangwani da sauran wasu abubuwa da ake sa naman da aka sarrafa a kimiyyance, ma’ana irin wannan yana taimakawa wajen kamuwa da cutar kansa. Hakanan man sun ce jan nama ma watakila na iya haifar da cutar kansa. Sai kuma akawai da yawan bincike da aka gudanar a kafofin bincike na kasashen Turai da su China wanda ya alakanta ciwon kansa da cin abinci da suka fito a jikin dabbobi. Bugu da kari kuma a ko da yaushe muka samu ziyartar likitoci su kan bamu shawarwari na mu rage cin nama,musamman idan shekaru suka fara ja. Saboda haka cin abinci da ya kunshi zallar tsirrai ko kuma ganyaryaki ai ba wani laifi ba ne, musamman ma idan aka yi la’akari da hadarin da yake tattare da yin hakan.
