Gwamna Uba Sani Ya Nada Bashir Zuntu A Matsayin Babban Akanta Na Jihar Kaduna

Gwamnan jihar Kaduna, Sanata Uba Sani ya amince da nadin Bashir Suleiman Zuntu a matsayin Babban Akanta na jihar Kaduna. Kuma ya fara aiki nan take.

Bashir Suleiman Zuntu mamba ne a kungiyar akantoci, kwararre ne masanin makamar aiki kuma haziki. Ya yi aiki a matsayin babban akanta a ma’aikatar kasuwanci da zuba jari ta tarayya kuma babban akanta a sashen kudi a gidan rediyon tarayyar Nijeriya FRCN.

• Gwamna Uba Sani Ya Yi Sabbin Nade-naden Mukamai A Jihar Kaduna

Zuntu, tsohon mai taimakawa ne a majalisar wakilai ta jihar Kaduna wanda kuma ya taba rike mukamin shugaban karamar hukumar Kubau ta jihar Kaduna daga 2021 zuwa 2023.

Ya yi digiri na biyu a fannin kudi (Msc) a Jami’ar Coventry da ke kasar Ingila sannan ya yi digirin farko a fannin lissafin kudi a jami’ar Abuja.

Bashir Suleiman Zuntu yana da kwarewa a fannin kudi, hada-hadar kudi da gudanar da harkokin gwamnati da bunkasa dabaru da aiwatarwa.