Gwamnan jihar Gombe, Alhaji Muhammadu Inuwa Yahaya ya bayyana alhini gami da jimamin rasuwar Sanata Sa’ad Abubakar Mohammed wanda ya rasu a ranar Juma’a ya na da shekaru 80 a duniya.
Sanata Sa’ad wanda ya wakilci yankin Gombe ta tsakiya a majalisar dattawa daga 2003 zuwa 2007, har zuwa rasuwarsa shi ne Tafidan Deba.
Ta cikin sakon sa na ta’aziyyar da ya fitar dauke da sanya hannun Ismaila Uba Misilli, Babban Daraktan yada labaran gidan gwamnatin jihar Gombe, gwamna Inuwa Yahaya ya bayyana marigayin kuma Dattijo a matsayin dan kishin kasa wanda ya kasance jajirtaccen ma’aikacin gwamnati, wanda ba za a taba mantawa da rawar da ya taka wajen ci gaban al’umma ba, a matsayin sa na dan majalisar tarayya dama kasance war sa dan kasuwa.
Ya ce, rasuwar tsohon Sanatan, babban rashi ne ba ga iyalan sa kadai ba, sai dai ma ga kasa baki daya.
A madadin gwamnati da al’ummar jihar Gombe, gwamnan ya mika ta’aziyya cike da alhini da kaduwa ga iyalan mamacin da abokan sa dama daukacin al’ummar masarauta da karamar hukumar Yamaltu Deba, yana mai addu’ar Ubangiji ya jikan sa ya gafarta masa, ya sa Aljanna Firdausi ce makomar sa.
Marigayin wanda ya kasance Injiniya a harkar sadarwa, ya bar mata daya da ‘ya’ya 7, an binne shi jiyan kamar yadda addinin Islama ya shimfida bayan masa sallar jana’izar da aka yi a babban Masallaci na kasa dake Abuja.
