Gwamnatin Jihar Kano ta bayyana bayar da tallafin Naira miliyan ɗaya ga kowanne iyali daga cikin iyalan ’yan wasa da jami’an da suka rasu a mummunan haɗarin mota yayin dawowarsu daga gasar National Sports Festival da aka kammala a Abeokuta, jihar Ogun.
Wannan sanarwar ta fito ne daga bakin mataimakin gwamna, Kwamared Aminu Abdussalam Gwarzo, yayin ziyarar ta’aziyya da ya kai asibitin Nasarawa a Kano.
- Mutane 21 Sun Mutu A Tawagar Ƴan Wasannin Kano A Hatsarin Mota
- Ƙungiyar Gwamnoni Sun Yi Ta’aziya Kan Rasuwar Ƴan Wasan Kano 21
Mataimakin gwamnan ya bayyana cewa wannan rashi babban rashi ne ga jihar da Nijeriya gaba ɗaya, domin waɗanda suka rasu sun wakilci Kano da kwazo da kishin ƙasa, har ma da samun nasarori. Ya ce: “Wannan rana ce mai cike da baƙin ciki a tarihin wasanninmu. Wasu daga cikinsu sun dawo da lambobin yabo.”
Daga cikin waɗanda suka rasa rayukansu akwai kakakin hukumar wasanni ta jihar, Ibrahim Galadima; mai ɗaukar hoto, Bilal Ahmad Salisu; direbobi, ma’aikatan lafiya, da ’yan wasa daga ƙungiyoyin kokawa da Dambe. Gwamnati ta kuma sha alwashin cewa za a raba kayan abinci da abubuwan buƙata ga iyalansu, tare da kulawa ta musamman ga waɗanda suka jikkata.
Kwamared Gwarzo ya kuma ziyarta asibitin Murtala Mohammed inda ake kula da wasu daga cikin waɗanda suka jikkata. Ya tabbatar musu da cewa gwamnatin Kano za ta tallafa musu har su warke, tare da yin addu’ar samun sauƙi da gafara ga mamatan.
