Gwamnatin Tarayya Za Ta Sake Cin Bashi Daga Bankin Duniya –Ministar Kudi

Ministar kudi da kuma tsare-tsaren kasa, Zainab Ahmad ta ce bashin da Nijeriya za ta ciyo daga Bankin duniya na dalar Amurka biliyan 3 za ayi amfani da shi ne domin inganta sashen lantarki.

Zainab ta fadi wannan maganar ne a lokacin da take zantawa da ‘yan jarida a birinin Washington DC na Amurka, inda ta je domin halartar taron IMF.

Ministar wadda ita ce ke jan tawagar gwamnatin Nijeriya a wurin taron ta ce za ta yi magana mai zurfi da hukumar bankin duniyan domin ba su bayanin aikin da za ayi da kudin.

Ta ce, a bisa tsarin gwamnatin tarayya na samar da ingantacciyar wutar lantarki, bashin zai yi amfani ne a bangarori biyu na sashen wutar da suka hada kamfanin samarwa da kuma masu bayar da wutar ga jama’a.

Ministar kudin ta ce: Akwai kudurin gyaran lantarki da gwamnatin Nijeriya ke shirin yi kan kudi tsakanin $2.5bn zuwa $3bn. An shirya gudanar da wannan aikin ne domin magance matsalar lantarki a kasar.

“Zamu yi zama na musamman domin tattaunawa da hukumar bankin duniya game da wannan al’amari na wutar lantarki. Makasudin yin hakan kuwa shi ne domin hukumar bankin su samu gamsuwa a kan abinda muke da niyyar yi da bashin idan an bamu.” Inji ta.

Bugu da kari, Zainab Ahmad ta ce bashin zai kasance gida biyu inda za a soma karbar $1.5bn kafin daga baya a karbi sauran cikon.

Exit mobile version