RelatedPosts

Majalisa Ta Yi Gyara Ga Sashen ‘Yar Tinke A Dokar Zabe

January 19, 2022

Lantarki Ya Kashe Wani Lokacin Da Yake Satar Waya A Kano

January 19, 2022

Daga Khalid Idris Doya,

A kalla mutum ashirin da uku (23) ne aka tabbatar da mutuwarsu yayin da wasu karin mutum 33 suka gamu da munanan raunuka sakamakon hatsarin motar Tirela a kauyen Masha da ke kan hanyar Makere-Mokwa a jihar Neja da yammacin ranar Litinin.

Har-ila-yau, Shanu da Awaki da dama ne suka hallaka sakamakon wannan hatsarin.

Babbar motar wacce ta kwaso shanu da wasu kayayyakin gona tare da mutane a cikinta da niyyar zuwa kudancin kasar nan kila domin gudanar da harkokin kasuwanci.

Mutum sama da 55 ne aka bada rahoton cewa su na cikin babbar motar lokacin da hatsarin ya faru, sai dai direban motar da Karen motarsa babu abun da ya samesu kamar yadda ganau suka shaida.

An kwashi dukkanin wadanda suka jikkatan zuwa babban asibitin Mokwa domin nema musu jinya daga wajen kwararru wanda yanzu haka su na kan amsar kulawar jami’an lafiya, inda kuma aka kwashi wasu daga cikin gawarwakin zuwa dakin adana gawarwaki na asibitin.

Shugaban shiyya na hukumar kiyaye hadura ta kasa (FRSC) a jihar ta Neja, Mista Joel Dagwa, ya tabbatar da faruwar lamarin a sanarwar manema labarai da ya fitar, inda yake mai cewa hatsarin ya rutsa ne da wata babban mota Daf Trailer (kirar 95).

Dagwa dai bai bada lambar motar da ta samu hatsarin ba, sai dai ya gargadi direbobi kan tsula gudun tsiya a kan hanya.

Shugaban ya bayyana cewa motar ta taso ne daga jihar Kebbi wacce ta nufi jihar Legas, “Dukkanin mutanen da suke cikin tireban maza ne,” inji shi.