Indiyawa Na Amfani Da Magungunan Gargajiya Wurin Maganin Coronavirus

A yayin da masana ke ci gaba da neman maganin Coronavirus, wasu mutane sun fara komawa ga magungunan gargajiya, inda a wasu lokuttan gwamnatin kasashensu ke goya musu baya.

Wannan dabi’a tafi samun karbuwa a kasar Indiya da China masu yawan jama’a kuma da suka kwashe shekaru masu yawa suna amfani da maganin gargajiya kamar yadda DW Hausa suka labarto.

Inda rahoton ya ci gaba da cewa; sai dai ana samun mabanbantan ra’ayoyi. A Indiya gwamnati na shan suka bayan da ta sanar da cewa akwai wani maganin gargajiya da ka iya kare mutum daga Coronavirus.

A kasar China inda cutar ta fara bulla, hukumomi sun ce maganin gargajiya na aiki sosai wurin tunkarar cutar. A kasar Venezuela kuma shugaba Nicolas Maduro ya bayar da fatawar shan wani shayi na gargajiya zai iya kawo sauki ga cutar Coronavirus.

Hukumar Lafiya ta Duniya, WHO, dai ta yi gargadi sosai a kan amfani da irin wadannan magunguna. Sai dai ta ce akwai yiwuwar maganin gargajiyar ya rage radadin cutar amma ba warkarwa ba.

Exit mobile version