Daga Mahdi M. Muhammad,
Sashen tsaro na kasar Amurka ya yi alkawarin inganta hadin gwiwar na tsaro tare da sojojin saman Nijeriya (NAF), wajen yaki da masu tayar da kayar baya da sauran masu aikata muggan laifuka a cikin kasar, tare da ba hukumar tabbacin kukurin ta na karfafa kawancen.
Daraktan hulda da jama’a da yada labarai na rundunar, Air Vice Marshal Ibikunle Daramola ne bayyana haka a wata sanarwa da ya sanya wa hannu cikin makon nan, a inda yake cewa, Shugabar Sojin saman kasar Amurka (USAF), Honorabul Barbara Barrett ce ta ba da wannan tabbacin a cikin makon da ta gabata, wanda ta kai ziyarar girmamawa ga Shugaban Sojojin Saman Nijeriya (CAS), Air Marshal Sadique Abubakar, a hedikwatar NAF din da ke Abuja, tare da Jakadan Amurka a Nijeriya, Ambasada Mary Beth Leonard.
Daramola ya kara da cewa, Hon. Barrett ta bayyana cewa, hadin gwiwa tare da NAF zai kasance a bangarorin kayan aiki da siyan dandamali, horo tare da karin dama a fannin ayyukan sama, da sauransu.
Da yake take cigaba da magana, Hon. Barrett ta bayyana cewa, hadin gwiwar ya zama dole ne aiwatar da shi don habaka kwarewar gami da gina kimar da ake bukata don aiki da ingantaccen kayan aiki na karfin sama. A cewar ta, “Muna godiya da abubuwan da suka gabata kuma muna kuma fatan samun kyakkyawar alaka a nan gaba. Har ila yau, muna kuma duban hanyoyin da za mu iya kara fadada dangantakarmu ta hanyar kayan aiki da horo daban-daban don gudanar da ingantaccen aiki, kiyayewa da amfani da jiragen sama da kayan aiki. A gaskiya muna sane da cewa Sojin saman Nijeriya wata hukuma ce mai matukar kwarjini da kwarewa kuma muna tunanin cewa a duk fadin Afirka NAF ce hukumar da muke son hada gwiwa da ita,”in ji ta.
Sakatariyar USAF din kuma ta bayyana cwa, Amurka tana sane da kalubalen tsaro da ke fuskantar Nijeriya, saboda haka ta sake baiwa NAF din goyon baya.
Ta ce, “Muna sane da irin kalubalen da kasar nan ke fuskanta, musamman a Arewa maso Gabas da Arewa maso Yamma. Duk duniya tana bukatar Nijeriya don ta yi nasara. Dangane da haka ne zamu yi aiki tare da ku ta hanyoyin da suka dace. Muna tare da ku dari-bisa-dari don ganin manyan abubuwa sun wakana don yin abubuwan da suka dace kuma ayi su ta hanya madaidaiciya. Muna so kuma mu gina kan abubuwan da suka gabata kuma mu habaka dangantaka mai karfi. Muna mai da hankali ga bukatar amfani da wadatattun albarkatun da kyau, mun san wannan wani abu ne da shugabannin Nijeriya suka mai da hankali a kan sosai. Don haka yayin da muke gina wannan gaba, muna so ku sani cewa babbar dangantakar Amurka da Naijeriya ce da muke fatan ingantawa”. Don haka ta nuna matukar godiyarta ga shugaban sojin don tarbar da aka yi mata da tawagarta.
A cikin jawabinsa, Shigaban sojin sama ya bayyana ziyarar Hon Barrett a matsayin wata alama ta sadaukar da kai tsakanin sojojin sama na kasashen biyu. Ya kuma ce, Amurka ta taka muhimmiyar rawa a cikin nasarorin da NAF ta samu cikin ‘yan kwanakin nan. An horar da jam’an NAF a fannoni daban-daban a Amurka, tare da wasu a halin yanzu ke samun horon.
A cewarsa, “Muna matukar farin ciki da cewa muna samun ci gaba sosai ta fuskar sayen jirgin ‘A-29 Super Tucano’. Muna kuma matukar farin ciki da cewa jami’anmu maza da mata suna Amurka kuma daga rahotannin da muke samu a kowane mako, suna samun ci gaba sosai. A gare mu, abun farin ciki ne matuka kuma muna bin diddigin ci gaban da suke samu kuma muna fatan karbarsu cikin sauri domin mu tura su don magance wasu matsalolin da muke fuskanta.”
Air Marshal Abubakar ya kara da cewa, nasarorin da aka samu a cikin ‘yan shekarun da suka gabata, hukumar ba za ta same su ba idan ba da taimakon kasar Amurka ba. NAF ta samu goyon baya sosai daga Amurka dangane da musayar bayanan sirri, horo da sauransu.
“An gudanar da karatun cikin sauri a kwanan nan kuma ina so in ce yawancin jami’an da suka ci gaba da shirin suna aiki da kyau a wurare daban-daban na ayyuka,” in ji shi.
Shugaban ya ci gaba da cewa, Ziyarar a sansanin ‘407 Air Combat Training Group (407 ACTG)’ na NAF da ke Kainji na gabanin isowar jirgin ‘A-29 Super Tucano’. Ya ce, dukkanin wadanda ziyarori da aka kai, da yawa daga jami’ai daga kasar Amurka sun ziyarci wuraren yayin da NAF ke yin duk abin da mutum zai iya don kare sansanin tare da samar da yanayin da zai baiwa jirgin damar yin aiki yadda ya kamata.
Ya bayyana cewa, NAF ta tabbatar da cewa an tura wadatattun SF da abubuwan kariyar karfi zuwa Kainji don tabbatar da cewa duk lokacin da aka tura jirgin ‘Super Tucanos’, babu wani kalubale da zai fuskanta. A cewarsa, NAF ta inganta kayan aiki a cikin sansanin yayin da aka gina hanyar sadarwa ta hanyar kilomita 4.1 a cikin sansanin. An kuma sake gyara masaukin da ya dace ga jami’an Amurka da kuma malaman koyar da jirgin ‘Super Tucano’ domin su samu muhalli mai kyau don gudanar da ayyukansu. NAF kuma na shirye-shiryen samar da wutar lantarki da samar da ruwa a cikin sansanin, yayin da ake inganta asibitin zuwa cikakken asibitin NAF.
“Mun kuma samar da dakin motsa jiki da wasu wuraren nishadi wadanda a ganinmu, matukan jirgin masu zuwa daga Amurka za su ji dadin zama”, in ji shi.
A bangaren horarwa, shugaban, yayin da yake godewa Amurka kan damar da aka baiwa NAF na horar da matukan jirgin, ya nuna karin wuraren horon don hada da horo na dabara ga matukan jirgin ‘C-130H’ don bawa NAF damar amfani da ‘C-130H’ zuwa saukar da abinci da sauran kayan taimako na jin kai, musamman a yankin Arewa maso Gabas inda a yanzu haka ake amfani da jirgin sama mai saukar ungulu na ‘Bell-412’ don irin wadannan aiyukan tare da iyakokin sauka na kimanin 300Kg a kowacce sortie.
Air Marshal Abubakar ya kuma cewa, NAF din ma tana sha’awar horas da ‘Aeromedical’ don kara bunkasa ayyukanta na ‘Winning Hearts and Minds’ a yankin Arewa maso Gabas, inda a halin yanzu take da asibitoci biyu na Mataki 2 a sansanin Bama da Dalori, wanda ke aiki fiye da shekaru 4.
Ya kuma ci gaba da cewa, cibiyar duba cutar kansa a sansanin NAF da ke Maiduguri ita ma a bude take ga ‘yan gudun hijirar wadanda suma suke cin gajiyar wasu ayyukan kiwon lafiya na kyauta a kan lokaci zuwa lokaci.
Har ila yau, a yayin ziyarar ta karamcin akwai wasu Shugabannin hedikwatar NAF, reshen da kuma mashawarcin tsaron Nijeriya a Washington DC da mambobin sakataren kungiyar sojin saman kasar Amurka.
