Kashe Fararen Hula Na Karuwa A Iraki Da Syria

Wata Kungiya da ke sa’ido kan rikice-rikice a duniya ta ce hare-haren da jiragen yakin kawance karkashin jagoranci Amurka ke kai wa Iraki da Syria ya lankwame rayukan fararen hula sama da 700. Rahotan na zuwa ne a dai-dai lokacin da Kungiyar Amnesty international ta bukaci a aiwatar da bincike kan kisan fararen hula, a lokacin da aka yi kokarin kwato birnin Mosul na Iraki. Kungiyar Airwars da ke zaman kanta, ta ‘yan jaridu da masu bincike da ke amfani da kafafan sada zumuta da shaidun gani da ido, wajen tattara bayananta, ta ce fafatawar da akeyi da mayakan jihadi a Raka na Syria da Mosul da ke Iraki ya munana. Kuma alkaluman da ta fitar ya sha ban-ban dana Amurka, da ke cewa fararen hula 603 ta kashe a bisa kuskure tun kaddamar da yakin rundunar kawance karkashin jagorancinta a 2014. Daraktan Kungiyar ta Airwars, Chris wood, ya ce karuwar hare-haren kwato Mosul da Raka ya rubanya alkaluman fararen hula da suka kwanta dama, inda ya ce muradun Pentagon na kawar da mayakan jihadi ya jefa rayuwar fararen hula a cikin hatsari. Kungiyar ta ce tsakanin fararen hula 529-744 aka kashe a watan Yuni, karin sama da kashi 50 na watannin baya. A ranar talatar da ta gabata Amnesty ta bukaci a gudanar da bincike a Mosul kan kisan fararen hula, inda ta zargi dakarun Iraki da gaza kare rayukan al’umma. Sai dai Laftanar janar Stephen Townsend da ke jogoranci rundunar kawance yakar IS ya yi watsi da zargin.