Daga Abubakar Abdullahi Lafia
Shugaban kungiyar Fulani makiyaya ta Miyyetti Allah a Jihar Nasarawa, Alhaji Muhammadu Husseini, ya bayyana shan alwashin kungiyar na hukunta duk wani makiyayi, da aka kama yana kiwon dabbobinsa a cikin gonakin jama’a. Shugaban ya bayyana hakan ne a wurin bikin rantsar da sababbin zababbun shugabanin kungiyar reshen karamar hukumar Kokona a fadar Abaga Toni da ke garin Garaku .
Alhaji Muhammadu Husseini wanda ya koka da halayen makiyaya masu shiga gonakin manoma suna kiwo, ya sanar da cewa kungiyar za ta rika daukar matakan ladabtarwa a kan irin wadannan makiyaya da ke shiga gonaki da gangan. Ya kara da cewar, “Mun kafa kwamiti kuma za mu kafa wani, wadannan kwamitoci za su bi hanyoyin da suka dace na hukunci ga duk makiyayin, da ya shiga gona da gangan ya da kuma bata amfanin gona”.
Domin tabbattar da aiwatar da wannan matakin, Alhaji Husseini ya umurci shugabanin kungiyar na rassan jihohi da su kafa kwamitin zaman lafiya da za su rika sasanta tsakanin Fulani, makiyaya, da kuma manoma, idan rashin jituwa ya shuga tsakaninsu. Ya kuma yi kira ga Fulani musamman ma matasa da su guji shaye-shaye na kayayyakin da suke sa maye ,wanda ya ce sukan sa mutum ya aikata abubuwan da, ba daidai ba. Da ya tabo maganar ilmi, Alhaji Husseini ya ce ilmi na da muhimmanci ga rayuwar kowane mahaluki ya kuma kara da cewa kungiyar, za ta bullo da shirin neman ilimi ga ‘ya’yan makiyaya ya zama tilas. Da yake tsokaci game da zaben sababbin shugabannin, Ardon karamar Hukumar Kokona Alhaji Ibrahim Gambo ya yaba da yadda al’ummar Fulani da yawa suka fito zaben, tare da yin kira ga wadanda aka rantsar da su yi aiki a kan abubuwan da za su rika kawo zaman lafiya, tsakanin makiyaya da manoma domin kawo cigaba. Sababbin shugabannin da aka rantsar sun hada da; Umar Waziri Daga a matsayin shugaba, Alhaji Sale Musa mataimaki, Muhammad Abdullahi Akuni ma’aji, Yahaya Adamu shugaban matasa da Usman Mohammed a matsayin sakataren kudi. Zaben dai an yi shi cikin kwanciyar hankali da lumana.
