Daga Khalid Idris Doya, Bauchi
Ma’aikatar gona da albakatun kasa ta jihar Bauchi ta kaddamar da fara dashin itatuwan shuka wadanda za su taimaka wa jihar don kareta daga fadawa kwararowar hamada. An fara kaddamar da aikin ne a garin Lariye da ke karamar hukumar Zaki a jihar Bauchi, kaddamarwar wanda ya gudana a jiya.
A yayin kaddamarwar gwamnan jihar Bauchi Muhammad Abubakar, wanda babban mai tallafa masa kan harkokin tsaro Janar Ladan Yusuf Mai Ritaya ya ce a bisa yanda suka saba duk shekara ne ya sanya suka gudanar da wannan aikin na dashen itatuwa. Ya ce gwamnatin jihar Bauchi ta himmatu wajen inganta sha’anin noma a jihar a bisa haka ne ma gwamatin ta kawo shirye-shirye da tsare-tsare domin inganta harkar da suka shafi noman.
Ya ce, wannan dashen itatuwan zai kare jihar ne daga fadawa matsalar kwarauwar hamada da sauran matsalolin da hakan ke jawowa.
Da yake magana kan masu yawan yanke bishiyoyi da saresu ba tare da wata dalili ba, gwamnan jihar ya bada umurni wa jami’an ‘yan sanda da a kowani lokaci su ke kokarin kame duk wanda suka kama da wannan aikin “Ina kira ga jami’an ‘yan sanda da sauran bangarorin tsaro da su fito su sanya ido sosai domin su tabbatar duk wanda ya zo ya sare bishiya ba tare da izini ba su kamshi, a kaisa kotu, kotu ce take da hurumin da za ta yi abun da ta gaba dama a kan duk wanda ya aikata wannan laifin. Wannan shirin ne muka yi, kuma za mu tabbatar da an bi wannan sau da kafa”. In ji Gwamnan
Gwamnan ya ce zai ci gaba da mara bawa wa baturan gona domin a samu kaiwa ga nasarar indata harkar ta noma a fadin jihar ganin muhimmancin da hakan ke da shi a tsakanin al’umma. Ya kuma bayyana cewar gwamnatin jihar zata sanya ido sosai kan lamarin itatuwa da shokikin jihar.
A hirasa da manema labaru kan shirin, babban sakatare a hukumar gona da albarkatun kasa Dakta Bala Musa Lukshi ya bayyana cewar kashi saba’in na al’umman jihar Bauchi manoma ne, a bisa gaka ne suke bada himma da kuma kulawa ta musamman wa manoma da harkar noma domin inganta sha’ain “mun raba itatuwan da aka saba rabawa kullu, amma a wannan karon mun kara itatuwa biyu Dabino da kuma kwakwan manja. Su wadannan itatuwan biyun da gwamnatin jihar Bauchi ta sanyo amfanin da za su yi wa jihar Bauchi baya misaltuwa, za su kare jihar daga kwararowar hamada, musamman shi dabino yana da juriya wajen kare kwararuwar hamada, sannan shi dabino din nan zai yi ‘ya’ya zai kuma samar da abinci, kun ga, ga aikin yi zai samu ga abinci da za samar wa jihar haka shi ma kwakwan manja. Haka sauran itatuwan da muka kaddamar da rabawa a yau kowanne yana da na sa muhimmancin da zai taimaki jihar nan daga kwararuwar hamada”. In ji babban Sakataren
Lukshi ya ce, kimanin itatuwa kala daban-daban da adadinsu ya kai dubu shida da dari biyu ne 62,200 ne za a shuka a fadin jihar ta Bauchi. An kiyasce cewar nan da wata uku za a fara cin moriyar wasu daga cikin itatuwar irin su dabino da sauransu, inda Sakaraen ya ce irin itatuwar na zamani gwamnatin ta sayo domin inganta wannan shirin.
A nasa jawabin Sarkin Katagum, Alhaju Muhammad Kabir Umar wanda, Sarkin Yakin Katagum Alhaji Abubakar Yalwa ya bayyana muhimmancin da wannan dashen zai kawo wa al’ummarsu talakawar wannan yankin, inda ya jinjina wa kokarin gwamnan jihar Bauchi na inganta rayuwar al’umman yankin.
Sarkin ya ce “wannan dashen zai taimaka wajen dakile kwararuwar hamada, sannan itatuwa ne wadanda suke da muhimmanci a garemu. Don haka ita wannan kasar tamu”.
Sarkin sai ya yi kira ga jama’arsa da su ci gaba da bada himma kan noma da kiwo. Sai ya sha alwashin bada goyon baya da sanya ido domin kiyaye wadannan shukokin. “ina kuma kira ga jama’ana da su tabbatar da sun kiyaye wannan itatuwan domin cin moriyarsu. na ji dadi da yanda na ga wannan aikin na kaddamar da dashen ya gudana a wannan kauyen, mun gode da kokarin gwamnatin jihar nan”. A cewarsa
Da yake zantawa da wakilinmu, wakilin shugaban jam’iyyar APC na jihar Bauchi a yayin taron Muktar A. Sulaiman ya shaida cewar shi dashen itatuwa na da matukar muhimmanci a addinance “Manzo ya ce idan ka dasa bishiya kana da lada, sannan wannan itatuwan za su taimaki al’umma kan ta fuskoki da daman gaske. shi mai girma gwamna a kullum yana damuwa ya ga yanda zai shawo kan matsalar hamada. shi dashen itatuwa zai taimaka maka wajen tattalin arzikinka, zai kuma kare maka hamadanka da kuma baka isashen itacen da zaka sara domin dafa abinci”. In ji shi.
LEADERSHIP A Yau ta labarto cewar itatuwan da suka hada da Dabino, Dalbajiya, Zogale, Dorawar Turawa, Gwaiba, Lemo, Kasho, kwakwan manja haka kuma da itatun Malani, Mangoro da dai sauran itatuwan masu amfani ga jama’a ne aka kaddamar a wannan lokacin inda za a shuka su a dukkanin fadin jihar Bauchi domin yin rigakafin kare kai daga illar kwararuwar hamada.
Wakiinmu ya nakalto mana cewar nan take manyan baki da sarakuna iyayen kasa suka yi na’am da shirin inda suka jagoranci fara sanya itatuwan a muhallan da aka ware domin yin shukan. Jama’an yankin da aka kaddamar da aikin a wajensu sun nuna matukar jin dadinsu da wannan shirin na inganta sha’anin noma sai suka nemi gwamnatin ta ci gaba da taimaka musu domin samun cin moriyar romon Dimokradiyya a jihar. Daga bisani dai an rabar da irin shukokin ga jama’a domin su shuka a muhallansu da sauran wuraren da suka dace.
