Ministar Harkokin Tsaro a Nijeriya, Manjo Janar Bashir Salihi Magashi (mai ritaya), ya ce, ya ci alwashin cika wa Shugaban Kasa Muhammadu Buhari babban burinsa na tabbatar da cewa, gwamnatinsa ta kawo karshen matsalar tsaro a fadin tarayyar kasar.
Bayanin hakan ya na kunshe ne a cikin sanarwar da ministan ya bayar mai dauke da sa hannun mai taimaka ma sa kan harkokin yada labarai, Mohammad Abdulkadir, a Abuja yayin cikarsa shekara daya a matsayin minista, ya na mai cewa, zai yi hakan ne kasancewar Buhari a matsayin Babban Kwamandan Askarawan Nijeriya, wanda ya sadaukar da kansa ga kasar ba tare da son kai ko kasala ba.
Janar Magashi ya kuma gode wa Shugaba Buhari bisa damar da ya ba shi ta bauta wa kasarsa ta haihuwa, ya na mai cewa, yanzu ne ma su ka fara aiki tukuru ga Nijeriya da ’yan Nijeriya.
A yayin da ya ke tabbatar da irin goyon bayan da Shugaban Kasar ya ke bai wa rundunonin sojan kasar, don kawo karshen matsalolin tsaron da su ka shafi na ’yan tayar da kayar baya, satar mutane da garkuwa da su da kuma ’yan bindiga, Janar Magashi ya bayyana kwarin gwiwarsa da cewa, lallai haske na nan tafe a karshen al’amarin.
Daga nan sai ya yi kira ga dukkan Shugabannin Rundunonin Tsaron Nijeriya da su sake tashi tsaye wajen nuna kishin kasarsu, ya na mai karawa da kiran su da su rika yin aiki tare, domin nauyi ne wanda ya rataya a wuyan dukkan ’yan Nijeriya.
A karshe ya gode wa sojojin kasar da kuma dukkan masu ruwa da tsaki a harkokin tsaron Nijeriya bisa irin goyon bayan da su ke ba shi a tsawon kwanaki 365 da ya kwashe a ofis.
