- Sauka Suka Yi Don Kashin Kansu – Fadar Shugaban Kasa
- Su Waye Sababbin Shugabannin Tsaron Nijeriya?
Daga Nasir S. Gwangwazo,
A jiya ne Shugaban Nijeriya Muhammadu Buhari ya yi wani namijin kokari ya amince da saukar Shugabannin Rundunonin Tsaron kasar, wadanda suka hada da Babban Hafsan Tsaro, Janar Abayomi Olonisakin; Babban Hafsan Sojojin Kasa, Tukur Yusuf Buratai, Babban Hafsan Sojojin Sama, Air Marshal Sadikue Abubakar, da Babban Hafsan Sojojin Ruwa, Bice Admiral Ibok Ekwe Ibas, wadanda tuntuni da ma lokacin ritayarsu daga aiki ya wuce.
Sauke shugabanni tsaron zai iya kawo karshen cece-kuce da tereren da aka jima ana yi wa Shugaba Buhari bisa zargin sa da barinsu su cigaba da aiki duk da cewa, lokacin ritayarsu ya yi ba tare da ganin harkokin tsaron kasar yana bunkasa a karkashinsu ba, kamar yadda masu zargin ke gani.
Sai dai kuma, sabanin yadda aka rika bayar da wasu rahotannin cewa, Shugaba Buhari ya kore su ne, Fadar Shugaban Kasar ta sanar da cewa, sune suka sauka a kashin kansu, inda Buharin shi kuma ya amince da hakan.
A sanarwar da mai magana da yawun shugaban kasa, Mista Femi Adesina, ya sanya wa hannu jiya a Abuja, ya ce, Shugaban Buhari ya gode wa shugabannin tsaron masu barin gado bisa bauta wa kasarsu Nijeriya da suka ta fuskar aiki tukuru.
Sai dai kuma sanarwar ba ta tsaya iyaka nan ba, domin ta bayyana nada wasu sababbin shugabannin tsaron nan take.
Manjo Janar Lucky Eluonye Onyenuchea (LEO) Irabor shine sabon Babban Hafsan Tsaro na Kasa, shi kuma Manjo Janar Ibrahim Attahiru shine sabon Babban Hafsan Sojojin kasa, sannan Air Bice Marshal Isiaka Oladayo Amao ya zama sabon Babban Hafsan Sojojin sama, yayin da Rear Admiral Awwal Zubairu Gambo ya zama Babban Hafsan Sojojin Ruwa.
Manjo Janar Irabor, wanda shine Kwamandan Horar da Sojoji dake Minna kafin nadin nasa, an haife shi a ranar 5 ga Okotoba, 1965, a Aliokpu Agbor dake yanzkin Karamar Hukumar Ika ta Kudu a Jihar Delta.
Ya samu shiga Kwalejin Horar da Kananan Hafsoshin Soja (NDA) dake Kaduna a 1983, inda kasance a Kwas na 34, kuma an rantsar da shi a matsayin Second Laftanar ne a ranar 28 ga Yuni, 1986, inda ya fara aiki a sashen aikawa da sakonni na Sojojin Kasa. Ya halarci kwasa-kwasai da dama a gida da waje kan kwarewar aikin soja kafin hawa wannan mukami a jiya. Ya kuma samu digiri na biyu a Jami’ar Ghana da Bangaledash a lokuta daban-daban, sannan ya halarci fagen dama a gurare da yawa na cikin gida da waje,
Shi kuwa sabon Babban Hafsan Sojojin Kasa, Manjo Janar Attahiru, mai lambar aikin soja ta 8406, an haife shine ranar 10 ga Agusta, 1966, a Karamar Hukumar Kaduna ta Kudu, kuma ya shiga NDA dake Kaduna ne a Kwas na 35.
Kafin ba shi jagorancin sojojin kasan, shine Kwamandan bataliyar soja dake Inugu ta 82, inda gabanin nan ya taba rike ragamar Rundunar Lafiya Dole dake Maiduguri, wacce ke fafatawa da Boko Haram.
Sabon Babban Hafsan Sojojin Sama, Air Marshal Amao, kuwa an haife shi a ranar 14 ga Satumba, 1965, a jJihar Inugu, amma iyayenssa ’yan asalin Karamar Hukumar Oshogbo dake Jihar Osun ne.
Ya shiga makarantar soja ne ranar 19 ga Janairu, 1984 a Kwas na 35 a NDA Kaduna, inda aka rantsar da shi a aikin spja ranar 20 ga Disamba, 1986. Shi ma ya mallaki digiri na biyu a a fannin tsaro, sannan ya halarci kwasa-kwasai daban-daban kan harkokin tsaro a gida da waje. Haka nan ya shiga fagen fama a yake-yaken Boko Haram da aka jima ana fafatawa a yankin Arewa maso Gabas.
Sabon Babban Hafsan Sojojin Ruwa, Rear Admiral Gambo, wanda an haife shi ranar 22 ga Afrilu, 1966, dan asalin Karamar Hukumar Nasarawa dake Jihar Kano ne. ya shiga makarantar horon aikin soja ne a ranar 24 ga Satumba, 1984 a Kwas na 36, kuma an rantsar da shi a aikin soja ne ranar 24 ga satimba, 1988.
Ya halarci kwasa-kwasai da dama na harkokin tsaro, musamman ta fuskar sufuri da jigila, kuma yana da babbar difloma ta PGD, baya ga halartar kwaa-kwasai a kwararru lokuta daban-daban.
