Daga Khalid Idris Doya,
Wani mummunar hatsari mota ya faru a Bauchi inda mutum 20 suka kone da har hakan ya jawo ba a iya gane fuskokinsu.
Bayan da wasu motoci guda biyu suka yi taho-mu-gama da junansu a kan babban hanyar Maiduguri zuwa Bauchi, nan take mutum 20 daga cikin 22 suka mutu, yayin da sauran biyun suka gamu da raunukan masu tsananin gaske.
Ganau ya shaida cewar lamarin ya faru ne a daidai Mangorori da ke unguwar Tirwun kilomita uku kacal da cikin garin Bauchi jiya Lahadi da safiya.
An gano hatsarin wanda ya rutsa da motar Bas Hummer mallakin kamfanin sufuri ta jihar Borno wacce ta dauko fasinjoji 18 da nufin zuwa Maiduguri daga garin Jos inda suka kara da wata mota Golf wacce take tahowa daga karamar hukumar Misau zuwa cikin garin Bauchi dauke da fasinjoji hudu.
A lokacin da hatsarin ya faru wutar gobara ya tashi da motocin lamarin da ya kai ga kona fasinjojin da har ba a iya gano fuskokinsu kai tsaye, sai dai jami’an ‘yan kwana-kwana sun yi kokarin kashe wutar da har mata biyu daga cikin fasinjoji suka tsira da munanan raunukan a jikinsu.
Da ya ke tabbatar da faruwar lamarin, Kakakin’yan sanda jihar Bauchi, DSP Ahmed Wakil ya shaida cewar an kwashi gawarwakin mamatan zuwa dakin ajiye gawarwaki da ke asibitin koyarwa ta ATBUTH yayin da kuma mata biyu da suka tsira suke amsar kulawar likitoci a wannan asibitin.
Wakil wanda ya ce ba zai iya tabatar da menene musabbbin hatsarin ba zuwa yanzu, amma jami’ansu sun kai dauki cikin gaggawa bayan samun labarin aukuwar lamarin domin kai agaji ga wadanda lamarin ya shafa.
Zuwa aiko da rahoton ba mu samu wani cikakken bayani daga hukumar kiyaye haduta FRSC a jihar ba.
