An bayyana nadin Farfesa Umar Garba dambatta a matsayin Shugaban Hukumar Sadarwa ta kasa (NCC), wanda fadar Shugaban kasa ta yi, matsayin ya cancanta, musamman bisa la’akari da tarihinsa da irin gudummawar da ya ke bayarwa cikin al’umma, da kuma kwarewarsa, musamman yawan nasarori da manufofin da suka shafi yanayin kasuwanci ta hanyar sadarwar zamani da ci gaba.
Shugaban Majalisar Dokoki ta jihar Kano, Hon. Injiniya Hamisu Ibrahim Chidari ne ya yi wannan yabo cikin wata sanarwa da mai magana da yawun Majalisar, Uba Abdullahi ya sanya wa hannu, inda ya ce Shugaban Majalisar ya bayyana cewa Farfesa ya kasance abin alfari, wanda ya dora tubalin ci gaba a fannin sadarwa ta kasa.
Kakakin Majalisar ya ce, Injiniya Hamisu Ibrahim Chidari mnse, ya bayyana haka ne a lokacin da yake zanawa manyan manema labarai a Kano cikin makon nan. Injiniya Hamisu Ibrahim Chidari, ya ce ko shakka babu fadar shugaban kasa ta yi nade-naden da suka dace ta hanyar la’akari da tarihin nasarorin da Farfesa ya samu yayin da yake jagorantar Hukumar sadarwa ta koli.
Shugaban Majalisar ya bayyana farin cikinsa, bisa yadda Farfesan ya samu nasara kan yada shirye-shirye da saka hannun jari kai-tsaye na kasashen waje, da kuma kyakkyawan tsarin aikin da aka gabatar kwanan nan don yin rijistar layin waya, tare da rajistar shaidar zama dan kasa, wanda ya ce zai tafi tare da ci gaban tattalin arziki da zamantakewar al’umma, haka kuma zai taimaka sosai wajen daidaita ayyukan tsaro a cikin kasa.
