Daga, Sharfaddeen Sidi Umar,
Gwamna Aminu Waziri Tambuwal na Jihar Sakkwato ya bayyana cewar sakamakon gwaje-gwajen da aka yi masa kan cutar Korona ya nuna bai kamu da cutar ba.
Tambuwal wanda ya killace kansa a ranar Juma’ar da ta gabata a dalilin hulda da wasu muhimman mutane wadanda suka kamu da cutar ya ce a yayin da ya killace kansa ya gudanar da nau’ukan gwaje-gwaje daban-daban kamar yadda yake a ka’idar kiyaye kamuwa da Korona.
“A cike da godiya ga Allah madaukakin Sarki nake sanar da al’umma musamman na Jihar Sakkwato cewar sakamakon gwaje-gwajen da na yi sun tabbatar ban kamu da wannan cutar ba.” In ji Gwamnan a bayanin da ya sanyawa hannu da kansa a daren jiya.
“Ina godiya ga Mataimakina Hon. Manir Muhammad Dan’iya wanda ya rike mulkin wannan Jihar a yayin da nake a killace haka ma ina godiya ga Mai Alfarma Sarkin Musulmi, Muhammad Sa’ad Abubakar a kan goyon bayansa da dora ni a kan hanya. Bugu da kari ina matukar godiya ga Malamai, iyalina, ‘yan uwa da abokan arziki kan adduo’in da suka yi kan lafiya ta.”
Gwamnan ya yi kira ga al’ummar Jihar da su ci-gaba da bayar da goyon baya ga jajirtaccen aikin da Hukumomin da ke bayar da kariya kan cutar Korona a ciki da wajen jiha ke yi ta hanyar bin dukkanin ka’idoji da sharuddan kiyaye yada cutar.
