Daga Ahmed Dan’Asabe,
Daya daga cikin manyan matsalolin dake ciwa Al’ummar Unguwar Kura dake garin Lokoja, babban birnin jihar Kogi, tuwo a kwarya shine rashin isasshen hasken wutan lantarki wanda suka dauki tsawon shekara da shekaru suna fuskanta.
Sau da dama suna kai kukansu ga gwamnatocin da suka shude domin ganin sun magance musu matsalar,amma kuma shiru kake ji kamar an aiki bawa garinsu, lamarin daya tilasta musu tara kudade domin ganin an sayo naurar kara karfin wutan, lantarkin,amma kuma duk kokarinsu ta faskara, kuma a hakan suka kasance suna jiran tsammani.
Kamar yadda masu iya magana ke cewa”mai rai baya fidda tsammani” kwatsam sai gashi Allah ya kawo musu dauki ta hannun dan majalisar dattawa mai wakiltar mazabar Kogi ta yamma( Kogi West) a majalisar dokoki ta kasa, wato Sanata Smart Adeyemi, wanda yankin na Unguwar Kura na daya daga cikin mazabarsa.
Shi dai Sanata Adeyemi na wakiltar kananan hukumomi bakwai dake mazabar Kogi ta yamma, da suka hada da Lokoja, Kabba Bunu, Ijumu, Yagba West, Yagba East, Kogi da kuma Mopa Moro.
Sanata Smart Adeyemi dai ya samarwa da al’ummar ta Unguwar Kura katafaren nau’ra mai kara hasken wutan lantarki( Transfoma) mai nauyin KVA 500, a maimakon mai nauyin KbA 300 dake ke kafe a Unguwar da dadewa wadda baya iya daukar nauyin girman Unguwar.
Sanata Adeyemi ya ce samar da transfoman ga yankin,yana daya daga cikin alkawuran da yayi wa jama’ar mazabarsa a yayin da yake yakin neman zabe a 2019.
Ya ce wannan soma tabi ne, yana mai jaddada cewa nan gaba al’ummar yankin zasu ci gajiyar romon dimukradiyar da suka fi wannan.
Sai dai kuma dan majalisar dattawan yayi kira ga jama’a dasu cigaba da baiwa gwamnatin APC cikakken goyon baya domin samun karin romon dimukradiyya.
Sanata Adeyemi har ila yau yayi kira ga jama’a dasu goyi bayan gwamna Yahaya Bello a kudurinsa na neman takarar kujerar shugaban kasa a 2023 idan Allah ya kai mu.
Daga nan yayi alkawarin gudanar da kyakkyawar wakilci a zauren majalisar dokoki ta kasa dake Abuja, inda kuma ya godewa daukacin jama’ar mazabar Unguwar Kura a bisa fitowar farar dango da suka yi, inda suka zabi jam’iyyar APC a zabubukan da suka shude.
Da yake bayyana farin cikinsa,Shugaban jam’iyyar APC na karamar hukumar Lokoja, Hon Maikudi Bature wanda dan asalin yankin Unguwar Kuran ne, ya ce su kam babu abinda da za su sakawa sanata Smart Adeyemi da shi sai godiya,yana mai cewa wannan shine karo na farko da wani dan majalisar dattawa mai wakiltar mazabar ta Kogi ta yamma ya samarwa da yankin na Unguwar Kura romon dimukradiyya tun da aka fara dimukradiyya a 1999.
Hon Maikudi Bature ya kuma kara da cewa yankin na Unguwar Kura ta dade tana fama da rashin isasshen hasken wutan lantarki, wadda hakan yake gurgunta harkokin yau da kullum, musamman harkokin kasuwanci a yankin, kafin zuwa yanzu dan majalisa Smart Adeyemi ya samar wa yankin na’urar transfoma mai daukar nauyin KbA 500, wadda zai baiwa daukacin Unguwar isasshen hasken wutan lantarki ba tare da wata matsala ba.
Sai dai kuma Hon Maikudi Bature yayi kira ga jama’ar yankin na Unguwar Kura dama na karamar hukumar Lokoja dasu cigaba da baiwa jam’iyyar APC mai mulki a jihar Kogi goyon baya,inda ya bayyana cewa gwamnati ta kuduri aniyar inganta rayuwar al’ummar jihar.
Daga karshe, shugaban jam’iyyar na APC a madadin mambobin jam’iyyar na karamar hukumar Lokoja, ya sake nanata goyon bayansa ga dan majalisar dattijai mai wakiltar mazabar Kogi ta yamma,Sanata Smart Adeyemi a bisa kawo Unguwar Kura dauki.
Haka shima Hon Hamisu Dan Musa,wanda shine Superbisory Councillor mai kula da sashin ilimi a karamar hukumar Lokoja, ya bayyana farin ciki da kuma jin dadinsa a bisa kawowa Unguwar Kura taimakon na’urar transfomar kara hasken wutan lantarki.
Ya ce, “a gaskiya a yanzu muna ala san barka,domin kuwa mun dade muna fuskantar matsalar hasken wutan lantarki a Unguwar Kura, kuma gashi yanzu dan majalisar mu a majalisar dokoki ta kasa, Sanata Smart Adeyemi, cikin ikon Allah ya taimaka mana da na’uran transfoma.
“Wannan yana nuni da cewa mutum ne wanda ya san darajar al’ummar da yake wakilta. A don haka muke mika gidiyarmu gare shi kuma muna sake jaddada goyon bayanmu ga gwamnatin APC,” Inji Hamisu Dan Musa.
daya daga cikin shugabannin al’umna dake Unguwar Kura, Alhaji Abdullahi Bala, Kan Sarakunan Lokoja, godiya yayi ga Sanata Adeyemi a bisa samar musu da transfoma mai nauyin KbA 500, wadda a cewarsa hakan zai kawo karshen matsalar hasken wutan lantarki da al’ummar Unguwar suka dade suna fuskanta.
Alhaji Bala Kan Sarakuna ya kuma yi kira ga Sanata Adeyemi da yayi wa Allah da Annabi ya taimaka wajen samarwa da dimbin matasan yankin aikin yi, inda ya kara da cewa akasarin matasan sunyi karatun boko, amma kuma suna zaman kashe wando.
A karshe basaraken yayi addu’ar Allah ya sakawa sanata Smart Adeyemi da alheri tare da yi masa fatan gamawa lafiya.
Daya daga cikin masu ruwa da tsaki na Unguwar Kura, Mallam Musa Salisu,wanda aka fi sani da Alhajin Sarkin Ladanai, ya ce” A gaskiya Sanata Adeyemi ya taka rawar gani, inda ya ce yankin na Unguwar Kura ta kwashe shekaru da yawa tana fuskantar matsalar hasken wutan lantarki, sai yanzu da Allah ya kawo dan majalisa Smart Adeyemi wanda ya kawo wa yankin dauki.
A don haka ya ce suna godewa dan majalisa tare da jaddada goyon bayansu gare shi.
