Shiga Jirgin Kasa Sai Da Katin Shaida – Gwamnatin Tarayya

RelatedPosts

Majalisa Ta Yi Gyara Ga Sashen ‘Yar Tinke A Dokar Zabe

January 19, 2022

Lantarki Ya Kashe Wani Lokacin Da Yake Satar Waya A Kano

January 19, 2022

Gwamnatin Tarayyar Nijeriya ta sanar da cewa duk wani fasinja da zai shiga jirgin kasa mai aiki daga Abuja zuwa Kaduna dole ya nuna katin shaidarsa, ministan sufurin Nijeriya, Rotimi Amaechi ne ya ba da wannan umarnin ga hukumar kula da tashar jirgin kasa.

 Amaechi, yace, ‘duk wanda zai siya tikitin shiga jirgin toh sai ya nuna katin shaidarsa saboda daga yanzu za a dinga rubuta sunan kowa akan tikitin sa baro-baro saboda maganin masu babakeri.’

“Mun yi wannan tsarin ne saboda korafe-korafe da ake yawan samu daga matafiya, wanda ake zargin wasu ma’aikatan jirgin kasan na tara tikitin taragon farko wanda yake na masu sukuni, domin su siyar wa masu hannu da shuni, da kuma masu siyan tikitin dan su siyarwa wasu fasinjoji daban”, Inji Amaechi.

Ministan ya kara da cewa, ‘mun canzawa wasu daga cikin ma’aikatan da ake zargi da boye tikiti wajen aiki, sannan mun tura wasu ma’aikatan da za su tabbatar da aikin da wannan sabon umarnin.

 A karshen ya tabbatar da kokarin hukumar sufurin na ganin sun inganta harkokin sufurin jirgin kasa, ta yadda fasinjoji za su iya dogaro da jirgin kaco-kam.

Taragun jirgin hudu daya na masu sukuni ko `yan kasuwa, ragowar uku kuma na sauran jama`a, sannan an kayata su da na`urar sanyaya daki, ga kuma makewayi.

Batun tsaro na daga cikin abubuwan da ke kara wa jirgin tagomashi, musamman ma matsalar fashi da satar mutune da ake fama da ita a kan hanyar motar Abuja zuwa Kaduna, duk kuwa da cewa mahukunta na ikirarin daukar matakan murkushe miyagun da ke aika-aika a kan hanyar da kuma dazukan kewaye.