Hakika a duk inda mace ta ke ’yar kwalliya ce. Adon mace ya na kara ma ta kwarjini. Ta hanyar kula da gidanta zuwa kanta kadai ya isa uwargida ta sami zuciyar mijinta.
A duk lokacin da uwargida ta tashi ta gabatar da sallar Asuba, to bai kamata a ce ta koma ta kwanta ba. Ta cna idar da addu’ointa kamata ya yi ta nufi dakin girki, don dafawa mai gida da yara abincin safe. Kafin ya tashi daga bacci ya zamana kin dora abinci. Idan ki ka dora, ba wai zama za ki yi ba, sai ki ba wa abincin lokacin.
Ki yi Sauri ki tsaftace falonki da duk inda ki ka san maigidan zai shiga. Ki na yi ki na duba girki.
Da zaran kin kammala komai, sai ki zuba abinci a ‘food flacks’ ko mazubin da ya dace ki kai inda ku ke cin abincin ki jera. Sai ki yi sauri ki shiga wanka. Da ma kafin ki fito kin tanadi wutarki a kasko, wacce za ki sa turaren wuta.
Ki na fitowa, idan da yara ‘yan makaranta duk sai ki tashe su daga bacci, wanda za ki yiwa wanka ki yi mu su, wanda zai iya da kansa ki sa shi ko ki sa ta su yi wankan.
Ya na da kyau ki koyawa yaranki hanzari da zafin nama a nan. Sai ki yi sauri ki shafa mai ki shirya ’yan makaranta. Ke ma ki gyara kanki ki shafa hoda da jambaki. Ki yi kwalliyarki ‘simple’ ba ta tashin hankali ba. Idan ki na da doguwar rigarki ki dauko ki saka. Ki tabbata ta kama jikinki sosai.
Uwargida ya na da kyau dinkin kayanki na tsakar gida ya bambanta da na fita unguwa. Idan da hali hatta kyau da tsadar na yiwa mijinki kwalliya ya fita daban. Idan babu kitso a kanki ki gyara gashinki sosai. Ki bi jikin ki da turare; kama daga na jiki zuwa na tufafi. Ya zama kina ta kamshi ko ta ina.
Yara sun gama shiryawa kin kawo turare irin na yara mai dadin kamshi kin fesa mu su. Idan kuma babu ’yan makaranta shikenan. Sai a je a tsashi maigidan cikin siyasa da kwarkwasa; ba da hayaniya ko kwaramniya ba.
Idan sai an kai ruwa bandaki da ma tuni ke kin kai. Idan kuma da ruwa a cikin, shikenan ya na tashi sai ya nufi wanka. Kafin ya fito kin gyara gadon da ya tashi, kin gyara dakin tsaf kin sa turaren wuta ko fureshina.
Idan mai zuwa office ne, kada a bar shi ya makara. Idan dan kasuwa ne ya na da kyau a ce kin san lokacin tafiyarsa. Duk dai abin da a ke ciki ya zama dole ki tsaftace jikinki kin yi kwalliya. Kin shafa fodarki mai kyau, wacce ki ka san ta karbe ki.
Sai ki saka jambaki, mai kyau ki sa kwalli ki yi jagira, idan ki na yi. Idan kuwa ki na da yawan gira sai ki taje ta ta yi kyau. Da ma kin saka doguwar rigar ki kin yi kyau.
Ki tabbata kina yawan shishshige ma sa wajen cin abinci ta yadda kamshin turarenki zai kama shi sosai. Wannan shi ne salon kwalliyar safe mai tamke zuciyar maigida.
Da zarar ya fita, sai ki cire kayan ki saka kayan da za ki saka, don yin sauran ayyukan gida ta yadda za a tsaftace ko’ina, kafin mijinki ya dawo. Idan mai dawowa ne da rana, kafin ya dawo da rana kin tsaftace ko’ina. Sai ki sake yin wanka…
In sha Allah za mu zo mu ku da irin shiga da kwalliyar da ya kamata maigidanki ya zo ya same kid a ita a mako na gaba.
Tare da
LUBABATU YA’U (AUNTY LUBABAH)GSM: 08039690509 lubabatuce@gmail.com
