Tabawa tana cikin ‘yan tauri na farko-farko don a lokacin da ta shiga harkar babu mata da ke sana’ar tauri. Sunanta na gaskiya Hafsatu Muhammad Sani
Tarihinta
An haife ni kimanin shekara saba’in da biyar da suka wuce a garin Rano. A lokacin ana ɓoye yara ba a sa su a karatun boko don haka ba mu yi karatun boko ba sai dai na allo, kuma ko shi ɗin ma an fi ba wa karatun maza muhimmanci sosai don haka mu dai mukan bi yayyenmu ne maza zuwa makarantar allo. Gidanmu babban gida ne, mahaifinmu ‘ya’yansa ishirin da ɗaya ina da yayye uku amma duk cikinmu na fi kusa da mahaifina. Dalilin da ya sa mahaifina ya ja ni a jiki a lokacin shi ne, nice ‘yar fari gun mahaifiyata a lokacin kuwa ‘yan fari ba a kulawa da su, mahaifiyata sam ba ta ta tawa wannan ya sa mahaifina ya ja ni jiki ko ina ya cire ƙafa ni nake mayar da tawa. Ko da ma na tasa duk inda za shi muna tare.
Fara wasan taurinta.
Ni ‘yar gado ce don haka na tashi ne kawai na gan ni a cikin tauri. Tun ina bin babana a waje za a saka wasa na wawuro wuƙa a kama, har na fara zuwa kasuwa cin kasuwa ana gangi a taru ana wasa abokanan mahaifina su kama ni su yanka nima ta karɓa na yanka har ta kai ni zan sa wasan . Lokacin ana bin kasuwanni ana buga gangi ko busa ƙaho sai Mahaifina kan tura ni yace na shiga wasa lokacin ina tsoro gaskiya amma sai yake ƙarfafani tun ina gudu sai ya ce min “kada ki ƙara gudu duk ɗa namijin da ya kama ki da wasa na makami (wuƙaƙe) ki mayar. A da in an zo wasa ko ɗan maƙwabci ne in aka kira shi in ka waiwaya ka ga baya nan kai sai ka shiga a yi wasa ka tare masa. Ta ga nan dai na fara.
Ya batun aure da iyali ga tauri kuma an ci tauri?
Duka haka aka yi ai bikin magaji ba ya hana na magajiya. Aure duk wanda ya fito sai da ya tabbatar ya ji ya gani magabata sun faɗa masa ka ɗauka duk lokacin da wasa ya kama za ta don dai kai ba zaka iya kange ta ba, in har ta ji an busa ƙaho an yi kirari dole sai ta fita. Idan da gaske yana sona zai amsa da ya amince sai a yi auren. A haka duk na yi aure-aurena. Yarana uku biyu maza ɗaya mace amma mazan sun rasu tun suna ƙanana sai macen yanzu jikokina tara na wajen macen yanzu haka nan da kika same ni ina zaune gidan babban jikana ne.
‘Ya’yanki sun gaji tauri ko?
Ai da yake yarana kin ga na wani gida ne kuma in ba sa sha’awar tauri ba za su yarda su ci ba. Musamman yaran yanzu da boko ya ratsa su. Amma kin ga shi jikana da yake shi namiji ne ɗansa ina nan ina dafa shi.
Bayan sana’ar tauri ki na wata sana’a?
Bayan sana’ar tauri kuma ina sana’ata ta ɗanwake wadda ita ma na yi suna a cikinta, duk lokacin da ba wasa ina yin aba ta . Yanzu kuma da tsufa ya kamani ina zauna a gida amma duk da ina sana’ar sayar da itace.
Ya shiga jeji da farauta a na yi har yanzu?
Rabona da shiga jeji shekara ishirin yanzu da girma ya zo na sauka daga muƙamin sarkin dawa na ba wa yarona Yusuf sarkin dawa. Karena sunansa “wani mutum” ko zani na saya sai na nuna masa kuma ko fita zan yi shi nake ba wa jira kome za a faɗa yana ji Magana ce kawai ba ya yi . Amma har zuwa yanzu duk da na tsufa in an gayyace mu za mu je mu zuba idanu in abin ya gagari yaran sai mu shiga. amma in mun ga yara suna gwaninta sai mu ja da baya amma in an yi kiɗa wani bai fita ya yi kirari ya ce shi ne ba sai mu ce a ba mu wuri. Kuma har yanzu kome dare ka ji motsi za ka ɗau makami ka fita ƙarƙashin filonka ka tada kai da wuƙaƙe duk dai don ɓacin rana saboda maƙiyinka kullum nemanka yake yi don haka har yanzu da shirin kare kai nake kwana
Mene sirrin nasararki?
Duk abin da na samu a rayuwa biyayya ta ba ni shi. Na sami nasarori da yawan gaske a rayuwa sunana ya je inda ban taɓa tunanin zan taka ba. Sannan lokacin da Buhari yana mulki lokacin soja shi ya naɗa ni sarkin dawan Kura da Rano sannan ya yi min kyauta shi da wasu sojoji shi ma kuwa na samu wannan kyauta ne ta sanadiyyar jarumtar da na nuna.
Wanne ƙalubale ki ka samu?
Tauri sana’a ce ta sai da rai don haka ban taɓa sa ran in na fita zan dawo da raina ba don haka ma kullum zan fita sai na yi sallama da mutanen gida ko dai na dawo ko a dawo da ni sana’a ce ta cika baki da ashariya sai fankama ko wa ye kai ko waye ubanka wannan kaɗai ya ishe ka ƙalubale. Sannan yadda a yau sana’ar tauri ke neman rushewa nan ma babban ƙalubale ne. Yaran yanzu saboda boko duk sai suke ganinmu kamar ma ba a kan dai-dai muke ba. Hatta gwamnati a yau ta sa takunkumi na shiga jeji sai an karɓo izini. Kuma a hakan ma in an yi rashin sa’a sai a farmana a jejin ko watannin baya haka aka kasha mutanen mu a jeji. Yawan da jama’a suka yi a yanzu asiran ma na taurine sun yi wuyar saboda a ƙa’ida in za a fita ɗebo asiran ba a son a ga kowa tun daga kan hanya har zuwa jejin to a yau ko me tsakar dare ka fito sai ka ga mutane. Na sha fitowa cikin dare ina gaf da shiga jeji zaka ci karo da wani ya gaisheka dole ka koma.
Rashin jajircewa ta yaran yanzu ita ma babban ƙalubale ne ni na fita farauta da tsohon ciki kawai don kare sunan mahaifina inda a jejin da suka lura da yadda na galabaita a kafaɗa aka dora ni amma hakan bai sa na ce a juya ba.
