Daga Litinin Zuwa Alhamis Na Wannan Makon
Hukumomin sojan saman Nijeriya sun tura dakaru na musaman kudacin jihar Kaduna don tabbatar da zaman lafiya. A wata hira da gwamnan jihar Kaduna Malam Nasir El-Rufai, ya ce rikicin kudancin jihar Kaduna ya somo daga Kasuwar Magani wuraren shekarar 1980 zuwa 1981, kuma duk bayan shekara uku ko hudu sai an sake yi a kudancin jihar Kaduna ko daga can ya bazu sauran sassan jihar Kaduna. Gwamnan ya ce a lokacinsa ne rikicin ya daina yaduwa ko bazuwa zuwa wasu sassan jihar Kaduna saboda kokarin da gwamnatinsa ke yi idan irin wannan rikici ya somo daga can.
A jihar Yobe wasu ‘yan bindiga sun sace wani dagacin kauye da dansa a karamar hukumar Fune, sai dai yaron ya samu ya kubuce wa ‘yan bindigan saura mahaifinsa.
A jihar Kaduna, an gano wata budurwa Sadiya da wani mai wa’azin kirista ya sace ta a Tudun Nufawar Kaduna tun shekarar 2013, lokacin tana ‘yar shekara goma sha uku, ya kaita makarantar mishan da ke Jos bayan ya kiristar da ita. Bacewarta ta yi sanadiyar mutuwar mahaifinta da jefa danginta cikin mawuyacin hali. A yanzun an ganota shi kuma da ya saceta da canza mata addini yana hannu.
Wasu matasan Arewa masu kaunar zaman lafiya, sun bukaci a sallami Obadia Mailafiya daga cibiyar nazarin muhimman bukatu ta kasa NIPSS.
A shirye-shiryen zaben jihar Edo da Ondo, shugaban ‘yan sandan Nijeriya ya umarci kwamishinonin ‘yan sanda su sanya ido a kan wadanda ke rike da makamai.
Jama’a na ci gaba da tambayar inda aka kwana tsakanin ‘yan majalisa da minista Akpabio da ya ce su ne ke aiwatar da yawancin kwangilolin yankin Neja Delta, har suka ba shi wa’adin ya wallafa sunaye. Shiru tsakaninsu ba amo ba labari.
Hukumar Kididdiga ta Kasa ta ce rashin aikin yi ya karu da kashi 27 da ‘yan kai a karshen watanni shida na farkon shekarar nan da muke ciki.
Za a dinga duba farashin mai daga wata zuwa wata, ko farashin ya yi sama ko ya yi kasa, ya danganta ga yadda farashin ya kaya a kowanne wata.
Ma’aikatan kwalejojin foliteknik, da na kwalejojin ilimi, da na jami’o’i duk na gwamnatin tarayya, na ci gaba da korafin shekara daya da wata hudu ke nan suna dakon ariyas na sabon albashi. Haka nan wasu malaman jami’a na korafin wasunsu na bin albashin wata daya, wasu wata biyu, wasu wata uku, wasu wata hudu.
Mutanen kauyen Guibi da ke yankin karamar hukumar Kudan ta jihar Kaduna, na can suna ci gaba da kasancewa a killace ba shiga ba fita, saboda ballewar gadar da suka saba haurawa, da shugaban karamar hukumar Kudan na yanzun, Jaja, ya musu alkawari a lokacin yakin neman zabe, idan sun zabe shi zai gyara musu. Sun zabe shi har wa’adinsa na shirin karewa ya kasa gyara musu gadar.
TALATA
Muhimmiyar Sanarwa
A ranar Litinin, abokina Lawal Ali Garba ya ankarar da ni cewa wani yana fassara labarun da nake rubutawa zuwa harshen Ingilishi. Ni ban iya ganin fassarar ba, amma ya karanto mun fassarar da aka yi wa rubutuna na shekaranjiya, inda kasssara ake yi ba fassara ba, kuma turancin sai a hankali da ko ni da ban iya turanci ba, na yi fiye da shi. Saboda haka nake rokon mai fassarawa yake kuma raba fassarar da rubutuna ya daina. Kuma duk wata fassara da aka gani ta rubutuna ba ni na yi ta ba.
Oshiomhole ya je fadar shugaban kasa ya gana da shugaban kasa Muhammadu Buhari a kan zaben jihar Edo da ke tafe.
Kotu ta soke zaben gwamnan jihar Bayelsa Douye Diri da ba da umarnin gudanar da wani zaben cikin kwana casa’in, sai da gwamnan ya ce zai daukaka kara.
Gwamnatin Tarayya ta sanar cewa ashirin da tara ga watan nan za a dawo da zirga-zirgar jiragen sama zuwa kasashen waje, da za a fara da tashar Abuja da ta Legas.
Hadin gwiwar kungiyoyin daliban jami’o’in Nijeriya, da kwalejojin foliteknik, da kwalejojin ilimi da sauransu, za su yi zanga-zanga gobe laraba, don tilasta wa gwamnati bude musu makarantunsu don su koma su dora da karatunsu daga inda suka tsaya.
Shugabanin kungiyar kiristocin Nijeriya, sun ziyarci gwamnan jihar Kaduna Malam Nasir El-Rufai a kan rikicin kudancin jihar Kaduna.
An dawo da wasu ‘yan Nijeriya da suka je aikatau Labanan su wajen dari gida.
Ana can ana ci gaba da cin zarafin ‘yan Nijeriya da ke neman halaliyarsu a kasar Ghana, abin ba ko dadin ji.
Rabon da mutanen kauyen Guibi da ke yankin karamar hukumar Kudan ta jihar Kaduna su ga wutar lantarki sun kai wata biyar, ga gadarsu ta balle, ga hanya ba su da ita, ga makarantarsu ta firamare ko akurkin kaji albarka.
An yi tsiya-tsiya tsakanin ministan sufuri Amaechi da wani kwamiti na majalisar wakilai a kan wani bashi na kasar Caina.
Ma’aikatan mai sun dakatar da yajin aiki a kan albashinsu.
Sojojin sama na Nijeriya, sun ci gaba da luguden wuta ta sama, wuraren da ‘yan kungiyar Boko Haram suka fake a jihar Barno.
Dalibai sun soma rubuta jarabawar WAEC ta kammala sakandare.
Ghali Na’Abba tsohon shugaban majalisar wakilai ya amsa wata gayyata da hukumar tsaro ta DSS ta masa a kan wani tsokaci da aka ce ya yi a kan mulkin Baba Buhari.
Obadia Mailafiya ya kuma kai kansa hukumar DSS da ke Jos don ci gaba da masa tambayoyi a kan kalaman da aka ce yayi cewa akwai wani gwamna da ke jagorantar Boko Haram.
Ma’aikatan kwalejojin foliteknik da na kwalejojin ilimi da na jami’o’i duk na gwamnatin tarayya, na ci gaba da korafin shekara daya, da wata hudu ke nan suna dakon ariyas na sabon albashi, haka nan wasu malaman jami’o’i na gwamnatin tarayya, wasu na bin albashin wata daya, wasu wata biyu, wasu uku, wasu hudu, wasu biyar, kodayake wasu bayanai na nuna gwamnati ba ta da kudi.
Kasar Sin wato Caina, da ake zargin daga can kwaronabairos ta kyankyashe ta buwayi duniya, ta gano maganin cutar, bayan maganin da kasar Rasha ta gano ita ma.
Af! Allah Ya yi wa abokiyar aikinmu a gidan talabijin na jihar Kaduna, da ke zaune a titin Gwandu da ke cikin garin Kaduna Hajiya Raliya Sani rasuwa bayan wata jinya. Mun yi aiki da ita a KSTV da Capital TV, kuma in dai kuna wasaf da ita, to kullum da karfe shida na safe sai ta turo maka sako na fatan alheri ba fashi kamar yadda nake rubutu duk asubah. Har na yi mamaki rabon da ta turo mun tun ranar laraba da ta gabata karfe tara da rabi na safe wato 12/8/2020. Kuma ko a jiya (Litinin) ta hau wasaf da safe kafin ta rasu da rana. Na dawo daga tafiya ina bude fesbuk sai na ga tsohon abokin aikinmu a KSTV Sabo Suleman ya rubuta rasuwar tata.
Ga sakon da ta turo mun ranar ta laraba:
“Wish U Good Health
Happiness And Peace”
Kamar yadda na bayyana da farko haka take turawa duk wanda take da lambarsa kuma suke wasaf tare. Ga ta da zumunci don har gidana tana zuwa da motarta in ta tononta ina ce mata Rally Loss tana ce mun Guibi Love.
Allah Ya jikan Hajiya Raliya Sani Ya gafarta mata kurakuranta, mu da muka yi saura, Ya sa mu cika da kyau da imani Amin.
LARABA
Jama’a da fatan za a yi hakuri, don na yi rubutuna na yau (Laraba), na kammala shi karfe hudu daidai na asubah, kuma a lokacin na sake shi. Sai dai har zuwa yanzun karfe biyar saura minti ashirin da hudu na asubah ban san inda ya nufa ba ya yi nisan kiwo. Wannan na daya daga cikin kalubalen da nakan fuskanta. In hana ido bacci in yi rubutu, in sako shi ya yi batar dabo.
ALHAMIS
Gwamnatin jihar Kano ta ba da hutun alhamis, domin murnar shiga sabuwar shekarar Musulunci ta 1442.
Sojojin da suka yi wa Boubacar Keita na Mali juyin mulki, sun ce za su shirya zabe nan ba da dadewa ba, sun sa dokar hana walwala da rufe kan iyakokin kasar.
Nijeriya ta rufe ofishin jakadancinta da ke Ottawa a Canada/Kanada.
Taron Majalisar Zartaswa na jiya ya amince a kashe wata naira biliyan hudu ba wasu mutsamutsai wajen aiki kashi na biyu na Dam din Usama da ke Abuja, da batun gidaje.
A jihar Taraba, gwamnatin jihar ta bi gida-gida, har gida dubu ashirin da shida, ta tallafa musu da kayan tallafi na kwaronabairos.
Sojojin sama sun kashe ‘yan bindiga ashirin da tarwatsa tungarsu a jihar Barno, kafin nan ‘yan bindigan sun kai hari Magumeri suka bankawa asibitin da gwamnati ta gyara, da kamfanin sadarwa daya tilo da ke wajen da sauransu wuta. Suna cikin haka sojoji suka musu dirar mikiya.
Kungiyoyi da hukumomin tashoshin jiragen ruwa na kasar nan ba su yarda da wani yunkuri na kara kudin dakon sunduki/kwantena zuwa kasar nan da kashi dari hudu ba.
Kungiyar malaman jami’o’i ASUU ta kammala nata tsarin da ta kira APP a madadin IPPIS da ta ce ba ta yarda da shi ba, don gwamnati ta gwada shi ta gane akwai bambanci da kuma sahihanci ba walawala irin na IPPIS ba.
Gwamnatin Tarayya za ta kara himma wajen kyautata ayyukan kula da lafiya matakin farko don rage mace-macen mata da jarirai a lokacin nakuda da haihuwa a kasar nan.
Wata ‘yar ajin karshe a sakandare da ke rubuta jarabawar fita ta WAEC a jihar Kwara ta harbu da kwaronabairos, saboda haka aka kebeta take jarabawarta ita kadai.
Ana ta korafin ana ganin tambayoyi da amsoshin jarabawar WAEC da dalibai ke kan rubutata ta soshiyal midiya kafin ranar rubuta jarabawar.
A jihar Neja jami’an tsaro na nan sun dukufa suna farautar wasu ‘yan bindiga da suka kashe wasu sojoji a kalla biyu da wani dan sintiri, suka kuma sace wani bature.
Kungiyar Bunkasa Tattalin Arzikin Yamacin Afirka ECOWAS, ta dakatar da kasar Mali daga cikinta saboda juyin mulkin da sojoji suka yi a kasar.
Biden ya yi nasarar tsayar da shi a matsayin dan takaran demokrat a zaben shugaban kasa na Amurka da za a yi.
Da subahin Laraba da na gama rubutuna tatas, na sake shi da karfe hudu na asubah, na neme shi na rasa. Wasu masu tsokaci suka ce kidinafas ne suka yi awon gaba da shi. Sai na biya. Wasu suka ce ba mamaki ministan labaru ne ya tarbe rubutun. Wasu suka ce ya yi layar zana ne. Ni kuma na ce batar dabo ya yi. Wani ya ce ko dai ana TRACKING rubutun nawa ne? Rubutu dai ya yi nisan kiwo. Har yanzun bai dawo ba.
Af! Ana ta ci gaba da fassara rubutuna zuwa turancin Ingilishi a baibai. Ina dai kara ankarar da jama’a cewa ba ni ke yin wannan fassara ba. Wasu sun ce fesbuk ke karambanin fassarawa. Ko ma dai wane ne ke fassarawa to bai iya fassara ba.
