Ya Kamata A Soke Gasar Legue Cup A Ingila — Mourinho

Mai horar da tawagar kwallon kafa ta Manchester United, Jose Mourinho ya bukaci soke gasar League Cup a Ingila, in da ya ce, kwallon kafa za ta fi inganta a kasar muddin aka soke gasar.

Kalaman Mourinho na zuwa bayan watanni bakwai da ya jagoranci kungiyarsa har ta lashe kofin wannan gasa.

Sannan kuma a jiya ne Manchester United mai rike da kambi ta doke Burton da ci 4-1 a karawar da suka yi a gasar ta League Cup.

Amma duk da haka, Mourinho ya ce, illolin da gasar ke haifarwa sun zarta alfanunta.

Sau hudu Mourinho ke lashe gasar League Cup, in da ya lashe sau uku a lokacin da ya ke horar da Chelsea.

A wata sabuwa kuma, Kungiyar Manchester United ta bayar da rahoton cewar ta ci ribar fam miliyan 581 a shekarar 2017, bayan da aka samu karin kudin kallon tamaula ta talabijin.

A shekarar ce United ta lashe kofin Europa League da League Cup, sannan ta saka hannu da kamfanoni 12 domin tallata masu hajjarsu da samun karin kudin kallon kwallo da na tallace-tallace.

Kungiyar ta karu da makudan kudin shiga da ya karu a kallon talabijin a kakar shekarar 2016-17, kakar farko daga shekara uku da aka shiga yarjejeniyar nuna wasa a talabibin mafi tsoka a tarihi.

A shekarar ce a ranar 30 ga watan Yuni kudin nuna wasan tamaula ya yi tashin gwauron zabi daga fam miliyan 194.1 zuwa fam miliyan 140.4, wato karin kaso 30 cikin dari kenan.

United tana mataki na daya a kan teburin Firimiya tare da Manchester City da maki iri daya da yawan kwallon da suka ci da wadanda aka zura musu.

Exit mobile version