‘Yan bindiga sun kashe mutane uku ciki har da yarinya ‘yar kimanin shekaru shida a duniya, a Jihar Neja.
Rahotanni daga yankin Kotonkoro na karamar hukumar Mariga, sun nuna cewa ‘yan bindigar sun yi ta harbin motocin jama’a a daidai lokacin da fasinjoji ke kan hanyarsu ta shiga kasuwar garin.
- Fursunoni 11 Sun Kammala Digiri A Gidan Yari na Kaduna
- Ƴansanda Sun Kama Wata Mata Ɗauke Da Manyan Alburusai 350
Wani mazaunin yankin da ya bukaci a sakaya sunansa ya ce, ‘yan bindigar sun yi awon gaba da mutane da dama, ciki har da masu aiki a gonakinsu na shinkafa.
Wani mazaunin yankin, Alhaji Shehu Kotonkora ya ce, an kashe wani direban motarsa a lokacin harin.
Kakakin ‘yan sandan jihar, Wasi’u Abiodun, bai ce komai kan faruwar harin ba.
Amma shugaban karamar hukumar Mariga Hon. Abbas Kasuwar Garba, ya tabbatar da aukuwar harin.
Ya ce ‘yan bindigar sun fito ne daga dajin Zamfara, kasancewar yankin na da iyaka da jihohin Zamfara da Kebbi da kuma dajin Birnin Gwari da ke Jihar Kaduna.
