Daga Zubairu M Lawal Lafia
Labarai daga Jihar Nasarawa sun tabbatar da cewa wasu mahara sun kashe mutum guda tare da sace da dama.
Lamarin ya afku ne a yau Lahadi gab da Magariba a Karamar Hukumar Nasarawa ta Jihar.
Wannan lamarin ya biyo bayan dokar da Gwamnatin Jihar Nasarawa, karkashin jagorancin Abdullah Sule ta tura zuwa Majalisar dokokin jihar kan matsalar masu Garkuwa da mutane domin neman kudin fansa da matsalar Fyade.
Wakilinmu ya samu zantawa da Shugaban Karamar hukumar Nasarawa, Alhaji Sani Otos ta wayar salula inda ya shaida masa cewa maharan sun tsare hanyar Udege inda suka sace mutane tare da kashe wani dan uwan Shugaban Karamar hukumar mai suna Adamu Oboshi Obagu.
Shugaban ya ce, ya zuwa yanzu ba a san adadin mutanen da maharan suka tafi da su ba, sannan an dauko mamacin zuwa Asibiti.
