Daga Rabiu Ali Indabawa,
A ranar Laraba ne rundunar ‘yan sanda ta Jihar Gombe ta ba da gawar wani da ake zarginsa da satar mutane da wasu mutum uku da ake zarginsu da hannu a sace Babayo Magaji a Pinga. Wanda ake zargin da aka kashe mai suna Ustas an kashe shi a yayin musayar wuta da ‘yan sanda wadanda suka bi su zuwa daji inda aka sace wanda aka yi garkuwar da shi.
Kwamishinan ‘yan sanda na jihar, Maikudi Shehu, wanda ya yi wa manema labarai bayani game da lamarin ya ce an sace wanda aka yi garkuwar da shi ne daga gidansa a ranar Litinin.
“Wannan lamarin ya faru ne a ranar Litinin inda wasu mutane bakwai dauke da muggan makamai suka sace wani mutum da ake kira Babayo Magaji, daga gidansa, kuma dukkansu Fulani ne. Sun jagorance shi zuwa cikin daji suka isa wani dutse a wani wuri kuma suka yanke shawarar hutawa. A yayin da suke hutawa ne wanda abin ya shafa, Magaji ya tsere inda ya jawo hankalin mutanen da ke zaune a yankin don haka aka sanar da ’yan banga, mafarauta da ‘yan sanda, ”in ji shi.
Ya ce Magaji ya jagoranci mafarautan ’yan sanda da ‘yan banga zuwa wurin da abin ya faru, ko da masu garkuwan suka ga ’yan sanda, sai suka bude wuta. Kwamishinan ya ce a yayin musayar harbe-harben ne aka harbe daya daga cikinsu har lahira daya kuma ya tsere da raunin harsasai. “Ba zato ba tsammani, dukkansu sun fito daga Adamawa ne don su yi garkuwa da mutumin tare da imanin za su iya samun kudade masu yawa daga wurinsa saboda yana da shanu da yawa. An kama Aminu Musa daga yankin Karamar Hukumar Song a wata tashar mota. An kuma cafke wani da ake zargi yayin da yake kokarin hawa abin hawa a Pinga zuwa Adamawa, ”in ji shi.
Ya kuma fawa wa manema labarai cewa wanda ya tura su su sace Magaji shi ma ‘yan sanda sun dauke shi. Magaji yayin zantawa da manema labarai ya ce an nemi ya biya kudin fansa na Naira 300, 000 don a sake shi daga masu garkuwar. “Ina cikin gidana lokacin da suka zo suka dauke ni,” in ji shi.
Kwamishinan ya ce “a cikin mutum bakwai da ake zargi da satar mutane, mun kame uku; muna da gawar dayansu wanda ake kira da Ustas yayin da wasu mutane uku yanzu haka sun gudu. Ba zato ba tsammani muke cin karo da irin wannan lamari da ya faru a kusa da wannan hanya, don haka a halinzu muna kan kokarin ganin yadda za mu damke sauran mutum biyun. ”
Ya ce kungiyar masu garkuwa da mutane ta biyu na kokarin yin garkuwa da mutum ne lokacin da ‘yan sanda suka yi karo da su suka bude wuta. A cewarsa, lokacin da musayar wutar ta yi zafi, sai suka gudu da baburansu biyu. Ya ce ‘yan sanda suna ci gaba da bincike don sanin ko kungiyar guda ce da ke aiki a yankin, ya kuma tabbatar wa jama’a cewa ‘yan sanda za su yi komai don tabbatar da cewa mutane za su iya kwana da idanunsu biyu.
