- Rasuwarsa Babban Rashi Ne Ga Jihar Gombe – Gwamna Inuwa
Daga Khalid Idris Doya,
Gwamnan Jihar Gombe, Muhammad Inuwa Yahaya, ya kafa kwamiti karkashin Mataimakin Gwamnan Jihar, Dakta Manassah Daniel Jatau, da aka dora wa alhakin shirye-shiryen bikin jana’izar Marigayi Mai Tangale, Dakta Abdul Bubu Maisheru II, inda aka sanya ranar Lahadi mai zuwa, 16 ga Janairu, 20121, a matsayin ranar binne shi.
Wakilinmu ya nakalto cewa, Abdu Buba dai shine Mai Tangale na 5 wanda ya rasu ne a ranar 10 ga watan Janairu, yana da shekara 72 a duniya bayan gajeren rashin lafiya da ta riske shi.
Sakataren gwamnatin jihar Farfesa Ibrahim Abubakar Njodi ne ya sanar da batun kafa kwamitin shirye-shiryen bison babban basaraken, inda ya ce ranar Lahadi 16 ga Janairu ne za ta kasance ranar bison marigayin basaraken.
Ya sanar da mambobin kwamitin da suka hada da Nitte Amangal, shugaban riko na APC, Hon. Tulpukut Mai Kardi da Hon. Rambi Ibrahim Ayala na majalisar dokokin jihar Gombe.
Sauran sun hada da Justice Beatrice Iliya da kuma Justice Idi Appolos na babban kotun jihar, tare da Misis Margret Audu, shugabar karamar hukumar Billiri.
Saura sun kunshi, Hon. Mela Audu Nunghe (SAN), kwamishinan ayyukan musamman da takwaransa na ayyuka da gida Injiniya Abubakar Bappah Musa , Group Captain Bitrus P. Bilal (Rtd) mai baiwa gwamnan shawara kan tabbatar da bin dokoki, Mista Babaji Babadidi, shugaban SUBEB da Barr. Abdulrasheed Ajuji Waziri wanda shine (Wazirin Tangale) kuma kwamishian kula da harkokin kananan hukumomi da masarautu, inda kuma Hon. Ibrahim Dasuki Jalo Waziri zai kasance matsayin sakataren kwamitin.
A wani labari makamancin wannan Gwamnan Jihar Gombe Alhaji Muhammadu Inuwa Yahaya ya ziyarci fadar Mai Martaba Mai Tangale dake karamar Hukunar Billiri domin jajantawa bisa rasuwar babban Basaraken Mai Tangale Dakta Abdu Buba Maisheru II, inda ya shawarci iyalan marigayin basaraken da al’ummar kasar Tangale su kwantar da hankalin su, su ci gaba da dabbaka koyarwar zuman lafiya da marigayi Uban kasan ya koyar.
Da ya ke amsa tambayoyin manema labarai jim kadan bayan ziyarar, gwamnan ya bayyana kwarin gwiwar cewa Allah zai shigewa al’ummar Tangale gaba da gwamnatin Jihar Gombe wajen yin abin da ya dace anan gaba.
Ya ce, “Za mu ci gaba da hada kanmu a matsayin iyali guda ba tare da rarrabuwa ba, kuma Allah cikin hikimarsa zai mana jagora wajen yin abin da ya dace”.
A yayin ziyarar, Gwamna Inuwa ya samu rakiyar sakataren gwamnatin jihar Parfesa Ibrahim Abubakar Njodi, da shugaban ma’aikatan gidan gwamnati Alhaji Abubakar Inuwa Kari, da kwamishinoni da shugaban riko na Jam’iyyar APC Mr. Nitte Amangal, da mashawartan gwamna na musamman da sauran manyan jami’an gwamnati.
Tun farko a sakon ta’aziyya da gwamnan ya fitar, ya bayyana kaduwa bisa rasuwar Mai Martaban Dakta Abdu Buba Maisheru na 2, inda ya bayyana shi a matsayin shugaba abun koyi, wanda za a ci gaba da tunawa da shi da irin sadaukarwar sa kan tabbatar da zaman lafiya da hadin kai.
A sanarwar wanda Darakta Janar kan harkokin yada labaru na gwamnan, Isma’ila Uba Misilli ya fitar a shekaran jiya, gwamnan ya ce rasuwar Mai din babban rashi ne ba kawai ga kasar Tangale ba amma ga Jihar Gombe da Najeriya baki daya.
Gwamna Inuwa ya bayyana marigayi Mai Tangalen a matsayin Sarkin da ake mutuntwa da darajtawa, wanda ya kawo ci gaba, zaman lafiya da hadin kai a kasar Tangale da Jihar Gombe a shekaru 19 da ya shafe kan karaga.
Ya ce, “Mai Tangale ya ciri tuta ta hanyar sadaukar da kansa don tabbatar da dunkulalliyar al’ummar Tangale tsintsiya madaurinki daya, kasancewarsa mamba a majalisar sarakuna ta Jihar Gombe, kuma shugaban majalisar sarakuna Kiristoci na arewacin Nijeriya.
“Tabbas za mu yi rashi da kewar shawarwari da nusantarwa irin nasa na uba.”
Ya kuma yaba da kokarin uban kasan wajen tabbatar da zaman lafiya da ci gaban zamanta kewa a kasar Tangale, lamarin da ya sa ya zamo abun kauna da girmamawa ga talakawansa dama duk wanda ya yi mu’amala da shi.
A madadin gwamnati da al’ummar Jihar Gombe, Gwamna Inuwa ya na mika cikakkiyar ta’aziyyarsa ga iyalan marigayin da kasar Tangale bisa wannan babban rashi, yana mai addu’ar Allah ya baiwa al’ummar Tangale da na Jihar Gombe hakurin jure wannan babban rashi.
