Ƙasar Sin Ta Yi Alƙawarin Ƙarfafa Hulɗar Da Ke Tsakaninta Da Kano

Gwamnatin kasar Sin ta yi alkawarin karfafa alakar dake tsakaninta da gwamnatin jihar Kano, domin bunkasa ayyukan more rayuwa da bunkasa ci gaban masana’antu a jihar.

A cikin wata sanarwa da mai magana da yawun gwamnan, Sanusi Bature Dawakin-Tofa ya fitar, jakadan kasar Sin a Nijeriya, Yu Dunhai, ya bayar da wannan tabbacin ne a ranar Alhamis a lokacin da ya jagoranci tawagar ofishin jakadancin kasar a ziyarar ban girma da suka kai gidan gwamnatin jihar Kano.

• Tabbaci Kan Bunkasuwar Tattalin Arziki Mai Dorewa A SinTabbaci Kan Bunkasuwar Tattalin Arziki Mai Dorewa A Sin
• 2027: Na Shirya Tsaf Don Yin Aiki Tare Da Peter Obi Don Ceto Ƙasar Nan, Gwamnan Bauchi

Yayin da Gwamna Abba Kabir Yusuf ya karbe shi a zauren taron gidan gwamnatin, jakadan kasar Sin ya bayyana yadda al’ummar Sinawa a Kano ke jin dadin gudanar da kasuwancinsu ba tare da tsangwama.

A cewar Dunbai, gwamnatin kasar Sin tana kara inganta alakarta da jihar Kano a fannonin samar da abinci, kayayyakin more rayuwa, ilimi, tare da kasuwanci da gwamnatin jihar.

A fannin aikin gona, wakilin kasar Sin ya yi nuni da muhimmancin samar da abinci a jihar Kano, inda ya ce, jihar da ke da dimbin al’umma kamar kasar Sin, ta cancanci amfani da fasahohin zamani a fannin noma don karfafa samar da dimbin abinci.

A cikin sanarwar, Mista Dunhai ya bukaci gwamnatin jihar Kano da ta ci moriyar damar da kasar Sin ta samar na zuba jari a Nijeriya na sama da dala tiriliyan 20, domin farfado da ci gaban masana’antu da kasuwanci.

A nasa jawabin, Gwamna Yusuf, wanda ya tarbi tawagar jama’ar Sinawa da hannu biyu, ya kara da cewa, a shirye gwamnatinsa ta ke ta kara himma wajen hadin gwiwa domin ci gaban jihar baki daya.