12 Ga Yuni: Jami’an Soja 3 Sun Yanke Jiki Sun Fadi Yayin Gudanar Da Fareti A Abuja

Jami’an soja uku ne suka yanke jiki suka fadi a faretin ranar dimokuradiyya da aka gudanar a dandalin Eagle Square da ke Abuja a ranar Litinin.

Sojojin sun futo ne daga sashin sojojin daban-daban.

• ‘Yan Sanda Sun Kashe Dan Bindiga 1 Da Dakile Wani Hari Kan Hanyar Kaduna Zuwa Abuja

Faretin da shugaban kasa Muhammadu Buhari ya halarta, na ci gaba da gudana a yayin da aka ga wasu jami’an tsaro da na kiwon lafiya suna ta kai-komo domin kai wadanda suka fadin zuwa rumfunan da aka tanada a wurin, daga bisani likitoci suka samu nasarar farfado da su.

Taron ya samu halartar tsohon shugaban kasa, Goodluck Jonathan; Dan takarar shugaban kasa na jam’iyyar APC, Bola Ahmed Tinubu; shugaban majalisar dattawa, Ahmad Lawan; kakakin majalisar wakilai, Femi Gbajabiamila; mataimakin kakakin majalisar wakilai, Idris Wase; Alkalin Alkalan Nijeriya, Mai shari’a Tanko Muhammad da shugaban jam’iyyar APC na kasa, Abdullahi Adamu da sauransu.