Buhari Da Tinubu Sun Yi Ganawar Sirri A Fadar Gwamnati A Abuja.

Zababben shugaban kasa, Asiwaju Bola Ahmed Tinubu, ya yi wata ganawar sirri da shugaban kasa Buhari kana suka yi sallar Juma’a tare a masallacin fadar shugaban kasa da ke Aso Rock Villa, Abuja.

Mai magana da yawun shugaban kasa, Garba Shehu ne ya bayyana hakan a wata sanarwa da ya fitar, inda yace kafin su shiga Sallar Juma’a, sun yi ganawar sirri, inda suka gaisa da juna kuma suka taya juna murnar kammala azumin Ramadan da murnar bikin Sallah.

Zababben shugaban kasar ya samu rakiyar kakakin majalisar wakilai Hon. Femi Gbajabiamila da gwamnoni biyu, Dr. Abdullahi Umar Ganduje na Kano da Abdulrahman Abdulrazaq na jihar Kwara da kuma Alhassan Ado Doguwa shugaban masu rinjaye na majalisar wakilai.