‘Yansanda Sun Sake Kama Wani Tserarren Gidan Yarin Kuje A Jihar Nasarawa

Jami’an ‘yansanda na jihar Nasarawa sun kama wani daga cikin wadanda suka tsere daga gidan yarin Kuje, Haruna Sunday.

Jami’an ‘yansandan sun kama Haruna ne mai shekaru 35 a garin Masaka da ke karamar hukumar Karu a jihar.

• Hukumar Gidan Yarin Kuje Ta Tabbatar Da Mutuwar Fursuna A Gidan Yarin Kuje

Rundunar ta kama Mutum Uke kenan daga cikin wadanda suka tsere daga gidan yarin bayan harin da ‘yan ta’adda suka kai a shekarar 2022.

LEADERSHIP ta tuna cewa, a watan Afrilu, 2023, ‘yansandan Jihar sun kama wani Salisu Buhari da aka tabbatar yana cikin tserarrun gidan yarin Kuje a karamar hukumar Nassarawa ta jihar bayan samun rahoton sirri akansa.

Har ila yau, kwanaki kadan bayan harin da aka kai wa gidan yarin, wani tserarre Hassan Hassan, wanda ake zargin dan Boko Haram ne, an sake kama shi a karamar hukumar Keffi da ke jihar.

A wata hira da manema labarai a hedikwatar rundunar a ranar Laraba a Lafiya, Haruna Sunday ya ce duk da cewa yana cikin wadanda suka tsere, amma shi ba dan ta’adda ba ne.