Masana Kimiya Na Sin Da Afirka Sun Yi Kira Da A Fito Da Tsaren-tsaren Abinci Masu Jure Sauyin Yanayi Don Kawar Da Yunwa

A jiya ne, masana kimiyya daga kasar Sin da Afirka suka sake jaddada kiran da ake yi na inganta tsare-tsaren noma da suka dace da yanayi da kuma jure matsalar sauyin yanayi, domin shawo kan matsalar yunwa da ta abinci mai gina jiki.

A jawaban da suka gabatar yayin wani taron tattaunawa da aka gudanar a Nairobi, babban birnin kasar Kenya, masanan sun amince da matsalar yunwa dake karuwa a Afirka, inda suka jaddada cewa, mafita mai dorewa ita ce koma wa ga ingantattun hanyoyin samar da abinci dake iya jure matsalar sauyin yanayi.

• Hannu Daya Ba Ya Daukar Jinka——Sin Da Afirka Za Su Kara Cimma Nasarorin Yaki Da Kwararar Hamada In Sun Hada Kansu

Darektan shirin hadin gwiwa na kasa da kasa a kwalejin kimiyya ta kasar Sin Yan Zhuang, ya ce yaki da matsalar sauyin yanayi da sauran matsaloli da suka shafi muhalli a nahiyar Afirka, zai dora nahiyar a kan hanyar samar da abinci na dogon lokaci. Yana mai cewa, hadin gwiwar dake tsakanin kasashe masu tasowa, zai taimaka wajen inganta matakan yaki da matsalar sauyin yanayi a Afirka da kuma gaggauta cimma burin ajandar samun ci gaba mai dorewa ta MDD nan da shekarar 2030 kan kawar da yunwa a nahiyar.

Kimanin masanan kasashen Sin da Afirka 100 ne ke halartar taro karo na uku kan sauyin yanayi da muhalli da zaman rayuwa da ke gudana a birnin Nairobi, don tattauna sabbin hanyoyin inganta abinci da abinci mai gina jiki a Afirka. (Ibrahim Yaya)