Kamfanin Twitter Ya Yi Barazanar Kai Karar Meta Kan Yi Masa Kishiya Da Threads

Twitter ya mayar da martani ga sabuwar sabuwar manhajar sada zumunta ta zamani mai suna Threads, ta kamfanin Meta a ranar Alhamis, inda ta yi barazanar kai karar kamfanin.

A cewar wani rahoto da Semafor ya fitar, ya bayyana cewa an aikewa, Mark Zuckerberg, wasika kamar yadda wani lauyan Twitter, ya ce, kamfanin ya yi matukar damuwa da kutsen fasaha da Meta ya yi da gangan da kuma satar sirrin yadda tsarin kasuwancin Twitter yake.

• Kamfanin Meta Mamallakin Facebook Ya Yi Wa Twitter Kishiya

Alex Spiro ya rubuta a cikin wasikar “Twitter yana da haƙƙin mallakar fasaha, kuma yana buƙatar Meta ya ɗauki matakan gaggawa don dakatar da amfani da duk wani sirrin kasuwanci na Twitter ko wasu bayanan sirri.”

Wakilan Twitter da Meta har yanzu ba su ce uffan ba game da karar.

LEADERSHIP ta ruwaito cewa Meta ya kaddamar da sabuwar manhajar sadarwa kishiyar Twitter a kasashe 100. Sabuwar manhajar ta samu rajistar sama da mutum miliyan 30 kasa da awanni 24 bayan kaddamar da ita.