Dan majalisar tarayya mai wakiltar mazabar Bosso/Paikoro a jihar Neja, Hon. Yusuf Kure Baraje, ya bukaci gwamnatin tarayya da ta tashi tsaye wajen ceto al’ummar mazabarsa daga ayyukan ‘yan fashin daji.
Dan majalisar ya ce halin rashin tsaro da al’ummar mazabarsa ke fuskanta abu ne da ke neman daukar matakin gaggawa domin matsalolin tsaro na kara ta’azzara.
- Majalisar Wakilai Za Ta Amince Da Kasafin Kudin 2024 Kafin Karshen Disamba
- Najeriya Ta Yi Imanin Shawarar BRI Za Ta Inganta Ci Gaban Kasashen Afirka
Ya ce, “Misali, a kauyena an kai hare-hare kusan sama da 10, ‘yan fashin har farfajiyata suka shigo suka farmake ni. A yanzu da nake magana da ku, ban taba ganin wani soja da aka tura domin yakar ‘yan fashin dajin a maboyarsu ba.
“Lokaci daya da sojoji suka zo zagayen bincike daga sansaninsu na Kantiri a lokacin da suke kan hanyarsu ta zuwa Kaduna amma babu sojojin da aka jibge a Neja da ke zaune takanas don dakile aniyar ‘yan bindiga.”
Ya nuna takaicinsa kan yadda masu garkuwar ke cin karensu babu babbaka duk kuwa da cewa suna kara jefa jama’a cikin matsin tashin hankali a kowane lokaci.
Ƙazalika ya ce, babu wani yunkuri da sojoji ke yi na ganin bayan ‘yan fashin dajin a halin yanzu.
Ya roki gwamnatin tarayya da ta yi duk mai yiyuwa domin cimma ‘yan fashin dajin a maboyarsu domin kawo karshen su cikin gaggawa don kauce wa yunkurin ‘yan fashin na share al’ummar kauyukan jihar daga muhallansu.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
