Assalamu alaikum masu karatu, barkammu da sake haduwa da ku a wannan makon a cikin shirin namu mai farin jini da albarka na Adon Da Kwalliya.
A yau shafin namu zai zo muku da yadda za ki magance tabon fuskarki
Idan kina fama da tabon fuska wanda hakan ya faru ne sakamakon mutuwar kuraje da suka fito a fuska, to ki zabi daya daga cikin wadannan hanyoyi don magance tabon fuska:
Na daya: ki kwaba garin bawon lemon zaki da ruwan lemon tsami da ruwa sai ki rika shafawa a kan tabon ya yi kamar minti biyar sai ki wanke.
Na biyu: ki hada tumatur da zuma ki shafa a inda tabon yake, ya yi kamar munti 15 sai ki wanke ki yi hakan kamar sau biyu a sati.
Na uku: Ki kwaba zuma babban cokali daya da babban cokali daya na orange peel powder sai ki shafa a kan tabon sannan ki wanke bayan ya bushe, ki yi hakan kamar sau uku a sati.
Na hudu: Ki shafa ruwan alo bera a kan tabon kullum in za ki kwanta sai ki wanke da safe.
Na biyar: Ki matse lemon tsami sai ki yi amfani da koton ki rinka shafawa a kan tabon ki barshi ya yi minti 10 sai ki wanke, ki yi hakan sau uku a sati.
Na shida: ki nika Dankalin turawa sai ki shafa a inda tabon yake ya yi kamar minti 10 sai ki wanke.
Na bakwai: Ki nika tumatir da kokumbe sai ki tace ki sa a firij ya yi kankara sai ki ringa shafa kankarar a kan tabon kullum.
Kurajen fuska ko pimples a turance
Wasu kuraje ne da suka fi fitowa a fuska musamman idan mutum yana ta’ammali da mayuka iriiri ba tare da kula da man da ya dace da fatar fuskar ba.
Matsalar kurajen fuska tafi shafar mata musamman matasa inda za’a ga wasu matan har nikaf suke sanyawa a fuskokin su saboda kar a ga ta’adin da kurajen suka yi musu a fuska. Maza ma su kan fuskanci irin wannan matsala ta kuraje a fuska.
Kadan daga cikin abubuwan dake janyo kurajen fuska sun hada da:
yawan cin abu mai maiko, amfani da mayukan da basu dace da fatar fuska ba, kwayoyin cuta, shiga rana sosai, aiki cikin zafi.
Mutane da dama kan kashe makudan kudade don sayen maganin da zai magance musu kurajen amma kuma yawanci ba’a samun biyan bukata. Ana iya magance kurajen fuska ta wadannan hanyoyin:
Bawon Lemon Zaki:
Ana shafa bawon lemon zaki a inda abin ya shafa sai ki barshi ya kwana da safe sai ki wanke da ruwan dumi.
Zuma:
Za ki samu zuma mai kyau ki goga da auduga a fuska, ki barshi zuwa ‘yan mintuna sai ki wanke. Za ki iya maimaitawa kamar sau biyu a rana har kurajen Su fita.
Ruwan lemon tsami:
Ruwan lemon tsami wata sahihiyar hanya ce mai matukar amfani wajen maganin kurajen fuska. Lemon tsami yana taka rawar gani sosai wajen kashe kananan kwayoyin cuta a fuska da kuma fitar da maikon fuska.
Yadda za ki yi amfani da lemon tsami shi ne
Ki samu lemon tsami ki matse ruwansa sai ki samu auduga mai tsafta ki dinga goge fuska daita kafin ki kwanta bacci, da safe sai ki wanke fuskar da ruwan dumin, za ki iya maimaitawa sau biyu ko uku a rana har kurajen su fita.
Ganyen Darbejiya, Man Darbejiya.
Ana kwaba ganyen Darbejiya da man Darbejiya a shafa a fuska zuwa mintuna biyar sai ki wanke da ruwan dumi ko ki dinga shafa man da auduga a fuskar har zuwa lokacin da kurajen za su baje.
Kurajen fuska dai sun dade suna bata wa mutane fuskokinsu har ta kai wasu ma sun gaji da nema wa kansu magani, mata ma kan yi duk yadda za su yi su rufe fuskokinsu don kar a ga kurajen, wasu ma kan yi amfani da hodar foundation akai-akai don boye kurajen dake fuskarsu. Wannan hanyoyi da na lissafa za su taimaka sosai wajen cire kurajen fuska cikin sauki ba sai mutum ya kashe makudan kudade ba wajen neman magani.
