Wasu sojoji 2 da wata farar hula mace guda 1 sun mutu ranar Juma’a sakamakon hatsarin mota da ya rutsa da su a kusa da garejin ajiye motoci na Obadeyi, Ijaiye da ke kan babbar hanyar Legas zuwa Abeokuta.
An gano cewa hatsarin ya auku ne a tsakanin wata babbar mota da wata mota kirar Mitsubishi saloon mai dauke da lamba RNG 396 AA.
- Yadda ’Yan Kasuwa Suka Rufe Kasuwanni A Legas Don Yankar Katin Zabe
- Da Dumi-Dumi: Ana Fargabar Mutane Sun Mutu Sakamakon Rushewar Gini A Legas
A sanarwar da hukumar bayar da agajin gaggauta ta jihar Legas (LASEMA) ta fitar, ta tabbatar da cewa wani mutum guda da ya tsira daga hatsarin an garzaya da shi zuwa asibiti domin kokarin ceto rayuwarsa.
Hukumar ta ce an sanya gawarwakin wadanda suka mutu a cikin jaka tare da jiran sojojin da suka zo don daukarsu.
An gano cewa direban babbar motar ne ya yi tukin ganganci inda ya mangari mota Mitsubishi a lokacin da mutum hudu ke ciki.
Sanarwar hukumar ta kara da cewa, “bincike ya nuna cewa babbar motar ce ta yi tukin ganganci da kauce wa hanyarta inda ta yi taho mu gama da karamar motar.
“Abun bakin ciki mutum hudu da suke cikin motar, biyu Sojoji ne kuma sun mutu da wata mace farar hula ita ma ta mutu, sai kuma dayan da ya gamu da raunuka inda aka garzaya da shi asibiti sakamakon wannan hatsarin.”
Sanarwar ta ce an mika motocin ga hukumar ‘yan sanda domin gudanar da bincike.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
