Manyan kungiyoyin gasar firimiya da dama na zawarcin Victor Osimhen kuma a yanzu an ruwaito cewa Newcastle United ce ta baya-bayan nan daga Ingila da ke son siyan dan wasan na Nijeriya, jaridar Chronicle ta ruwaito cewa an bai wa Newcastle damar daukar Osimhen daga Napoli a karshen kakar wasa ta bara.
Rahoton ya ce wakilan dan wasan sun yi imanin cewa Newcastle za ta zama wani wuri mai kyau ga Osimhen idan ya kammala zaman aro a Galatasaray, farashin dan wasan yanzu ya kai Yuro miliyan 75 wanda hakan ya yi kasa sosai da yadda aka yi mashi farashi a farkon kakar wasanni ta bana na Yuro miliyan 130 inda aka rasa kungiyar da za ta iya daukarshi.
Kungiyoyi sun janye sha’awar daukar tsohon dan wasan na Lille bayan da ya fara taka leda a Galatasaray, inda a yanzu ya zura kwallaye takwas kuma ya taimaka aka jefa hudu a wasanni tara, ya matukar taimakawa Galatasaray ta ci gaba da zama ta daya a kan teburin kofin kalubale na kasar Turkiyya kuma yanzu haka ta na gab da samun tijitin buga zagaye na gaba a kofin UEFA Europa League.
