Ba Za Mu Bari A Yi Wa Olmo Rajista A Barcelona Ba – Javier Tebas

Shugaban gasar La Liga, Javier Tebas ya ce har yanzu La Liga tana fafutukar ganin ba a yi wa dan wasan gaban Barcelona Dani Olmo rajista ba a karo na biyu, La Liga da Hukumar Kwallon Kafa ta Spain (RFEF) ba su yi wa Olmo rajista ba a ranar 1 ga watan Janairu bayan Barça ta kasa tabbatar da cewa sun bi ka’idojin huldar kudi ta gasar.

Amma duk da haka dai, kotun wasanni ta Spain (CSD) ta yi wa Olmo da dan wasan gaba Pau Victor rajista bayan Barcelona ta yi roko akan bukatar haka, “muna adawa da rajistar kuma muna daukar matakin da ya dace tare da hukumomin da abin ya shafa, domin ganin ba a yi ma shi rajista ba”, in ji Tebas a ranar Talata.

• Alkaluman Watsa Shirye-Shiryen Shagalin Bikin Bazara Na CMG Na 2025 Sun Kai Sabon Matsayi
• Fashewar Tayar Jirgi A Kano: Gwamnatin Tarayya Ta Dakatar Da Kamfanin Max Air Na Tsawon Watanni Uku

Hukuncin da kotun CSD ta yanke, ya haifar da cece-ku-ce tsakanin sauran manyan kungiyoyin La Liga, da suka hada da Atlético Madrid, Espanyol da Valencia.

Olmo ya buga wa Barça wasa sau uku tun bayan hukuncin da CSD ta yanke, a wasan Supercopa da Real Madrid da kuma wanda ta doke Real Betis a Copa del Rey da kuma Getafe a La Liga.