Sin Na Matukar Adawa Da Manufar Kariyar Ciniki Da Babakeren Amurka

Tun ranar 4 ga watan nan da muke ciki, Amurka ta fake da batun maganin Fentanyl, da nufin kakabawa Sin karin harajin kwastam na kashi 10% kan kayayyakin kirar kasar Sin da za ta shigar da su kasar Amurka. Game da wannan mummunan mataki mai sabawa ka’idar cinikin duniya da karya lagon tsarin kasuwanci tsakanin kasashen biyu, ba shakka Sin na matukar adawa da shi, kuma ba za ta zura ido ta rungume hannu tana ta kallo kawai ba. A wannan ranar kuwa, Sin ta mayar da martani, inda da farko ta kai kara a gaban kunigyar cinikin duniya ta WTO kan matakin da Amurka ke dauka, daga baya ta kara kakabawa Amurka harajin kwastam kan wasu kayayyakin da za a shigo da su kasarta, har ma ta shigar da wasu kamfanoni masu ruwa da tsaki cikin jerin sunaye wadanda ba su da aminci a kasar Sin. Jerin matakan da Sin take dauka na mayar da martani sun bayyana niyyar Sin ta kare halastaciyyar moriyarta da kiyaye tsarin cinikin duniya tsakanin mabambantan bangarori, abin da ya zama wajibi kuma ya dace da halin da ake ciki.

To, saboda ganin Amurka tana son nacewa kan batun maganin Fentanyl, ya zama wajibi mu san gaskiya game da batun. Jiya Talata 4 ga watan nan da muke ciki, gwamnatin Sin ta gabatar da takardar bayani kan matakan kayyade maganin Fentanyl ta Sin, inda Sin ta yi bayani kan dimbin ayyuka da take gudanarwa da amfani da fasaha da dabarun da take da shi na kayyade amfani da wannan magani a kasar. Muna iya fahimta daga takardar cewa, Sin daya ce daga cikin kasashen duniya mafi tsauraran manufofi na dakile miyagun kwayoyi da nuna iyakacin kokarin kawar da wannan mummunan aiki tun daga tushe a kasar. A shekarun nan baya, Sin ta amince da matakan da Amurka ke dauka kan batun Fentanyl bisa tunanin jin kai, amma sabanin da fahimtar da Sin take nuna mata, Amurka tana fakewa da wannan batu da nufin matsa mata lamba a bangaren harajin kwastam.

Amurka ba za ta magance matsalar Fentanyl dake dabaibaye kasar ba, sai ta yi shawarwari da bangaren Sin, don daidaita abubuwan dake tsakaninsu. Sin za ta bude kofarta don rungumar shawarwari tsakaninsu, amma idan Amurka tana nufin cimma wata boyayyiyar manufarta ta hanyar yakin harajin kwastam, to Sin za ta mayar da tsattsauran martani ba tare da bata lokaci ba. (Amina Xu)