Kirkira ita ce kashin bayan ci gaba, kuma hazaka ita ce ginshikin kirkira. A zamanin yau, fannoni masu tasowa musamman na fasahar zamani kamar kirkirarriyar basira (AI) da sauransu suna bunkasa, kuma akwai bukatu na matukar gaggawa ga sabbin hazaka. Hakan ya sanya kasar Sin ta maida hankali kan raya hazaka tun wuri-wuri, da kara zuba jari a fannin ilimi, da dasa iri na kirkire-kirkire don ya tsira a cikin zukatan matasa ta hanyar “zuba jari kan gina mutane”. Matakan da aka ambata a cikin rahoton aikin gwamnati a taruka biyu na bana, kamar bayar da tallafin tarbiyyar yara da karfafa tsare-tsaren tabbatar da kowane yaro ya samu ilimi ala tilas, ayyuka ne masu haske ga wannan manufa ta “zuba jari kan gina mutane” a fagen ilimi. Wannan manufa ba wai kawai ta mayar da hankali kan daidaikun mutane ba ne, har ma da la’akari mai zurfi ga ci gaban al’umma gaba daya. Manufar tana kuma mayar da hankali ga dukkan tsarin rayuwa la’akari da yanayi mai sarkakiya da muke ciki. Hakazalika, tsarin daidaitawa da fadada ayyukan yi na ba da cikakkiyar damar nuna hazakar mutane da kuma fahimtar kimarsu, kamar dai yadda tsarin bunkasa yawan kudin shiga na mazauna ke iya habaka tunaninsu game da hanyoyin samun riba da karin farin ciki da kwanciyar hankali.
Shugaban kasar Sin Xi Jinping ya halarci taron tattaunawa da nazari kan ganawar da wakilan jam’iyyar CPPCC daga fannonin kimiyya, fasaha da ilimi, wanda ya fitar da kwakkwaran matakai game da hangen nesa a ranar 6 ga watan nan da muke ciki, wanda ya jaddada muhimmancin kimiyya da fasaha da ilimi da hazaka ga zamanantar da kasar Sin, inda shugaba Xi ya jaddada cewa a nan gaba, ya kamata kasar Sin ta rungumi wani yanayi mai haske, inda za a samu masu kwazo da hazaka masu dimbin yawa, ta yadda kowa da kowa zai baje kolin basirarsa kuma a yi amfani da su yadda ya kamata. Har ila yau, a cikin rahoton aikin gwamnati na bana, an gabatar da sabbin dabarun “zuba jari kan gina mutane” a karon farko, wanda kamar fitila, ya haskaka muhimmin alkibla ga ci gaban kasar Sin a nan gaba. Sanin kowa ne cewa, a cikin ’yan shekarun nan, gwamnatin kasar Sin a dukkan matakai ta samu sakamako mai ban mamaki a fannonin zuba jari na zahiri wadanda suka shafi ababen more rayuwa, da kawo sabbin salon gudanar da harkokin birane da kauyuka. (Mohammed Yahaya)
