Kasar Sin ta harba kumbon Shenzhou-20 a yau Alhamis, inda ta aike da ‘yan sama-jannati 3 zuwa tashar sararin samaniyar kasar domin gudanar da aikin bincike na tsawon watanni shida.
An harba kumbon ne da misalin karfe 5:17 na maraice agogon Beijing, watau karfe 9:17 na safiya agogon GMT, daga cibiyar harba tauraron dan’adam ta Jiuquan da ke arewa maso yammacin kasar Sin, a cikin wani roka samfurin Long March-2F. Kumbon ya rabu da rokar tare da shiga cikin da’irar sararin samaniyar da ake so bayan mintuna 10 da harbawa.
- Shugaba Xi Ya Jaddada Aniyar Kasarsa Ta Goyon Bayan Kudurorin Kyautata Yanayi Da Ci Gaba Marar Gurbata Muhalli
- Tallafa Wa Al’umma: Ya Dace Gwamnoni Su Yi Koyi Da Jihar Zamfara – UNDP
Hukumar kula da sararin samaniya ta kasar Sin (CMSA) ta bayyana cewa, ‘yan sama-jannatin na kasar Sin, ko kuma ‘taikonauts’ kamar yadda ake musu lakabi, da ke cikin kumbon suna cikin kyakkyawan yanayi tare da koshin lafiya.
Sabbin ‘yan sama-jannatin da aka tura, za su gudanar da gwaje-gwaje da bincike game da yanayin rayuwa a sararin samaniya, da kimiyyar karamar fizgar kasa ko jazibiyya (micro-gravity physics) da sabbin fasahohin sararin samaniya.
Kazalika, za su kuma yi tafiye-tafiye mabambanta a sararin samaniya don kakkafa shingayen kariya daga baraguzai da tarkacen sararin samaniya, da kuma girkewa da dawo da na’urorin da aka makala a wajen tashar.
Ya zuwa yanzu dai, ‘yan sama jannatin kasar Sin 26 ne suka yi nasarar zuwa sararin samaniya. (Abdulrazaq Yahuza Jere).
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
