Dole Ne Tattalin Arzikin Nijeriya Ya Samar Da Ayyukan Yi Da Rage Talauci — Bankin Duniya

Bankin Duniya ya ce, akwai bukatar tattalin arzikin Nijeriya ya samar da kari kuma nagartattun ayyukan yi da rage talauci da fatara domin ci gaba mai ma’ana.

Bankin, a cikin rahoton baya-bayan nan da ya fitar kan ci gaban Nijeriya, ya ce, duk da cewa Nijeriya ta samu wani gagarumin ci gaba na maido da kwanciyar hankali a fannin tattalin arziki tare da inganta yanayin kasafin kudi, kasar har ila yau tana da wata dama ta musamman don inganta adadi da ingancin kashe kudaden raya kasa ta hanyar kara zuba jari kan rayuwar mutane, kariyar zamantakewa da ababen more rayuwa.

• Gwamnan Babban Bankin Sin: Harajin Amurka Ya Jefa Kasuwanni Da Kasashe Masu Tasowa Cikin Hadari
• Tattalin Arziƙin Nijeriya Ya Bunƙasa, Amma Farashin Kayayyaki Na Ci Gaba Da Tashi – Bankin Duniya

Bankin ya kuma yaba da yadda tattalin arzikin Nijeriya ke gudanar da ayyukanta, inda ya nuna cewa yanayin tattalin arzikin yana inganta sakamakon ci gaba da gyare-gyare.

Rahoton, ya bayyana cewa bunkasar tattalin arziki a cikin kwata na karshe na 2024, ya karu zuwa kashi 4.6 (shekara-shekara), yana tura ci gaba a cikin cikakkiyar shekara ta 2024 zuwa kashi 3.4, mafi girma tun 2014 (ban da sake dawowa 2021-2022 Korona).

Dangane da sabon Rahoton Ci Gaban Nijeriya (NDU), “Farfadowar baya-bayan nan sun kuma taimaka wajen karfafa kasuwar musayar kudaden waje da kuma matsayin Nijeriya a idon duniya.”

Habakar matsayi na kasafin kudi ya inganta a cikin 2024, ta hanyar habaka kudaden shiga. Gibin kasafin kudi ya ragu daga kashi 5.4 na kudin shiga a shekarar 2023 zuwa kashi 3.0 na kudin shiga a shekarar 2024, babban ci gaban da aka samu sakamakon karuwar kudaden shiga na daukacin tarayyar kasar, wanda ya karu daga naira tiriliyan 16.8 a shekarar 2023 (7.2 na kudaden shiga) zuwa kimanin naira tiriliyan 31.200.

Rahoton ya kara da cewa hauhawar farashin kayayyaki ya tsaya tsayin daka amma ana sa ran zai fadi zuwa matsakaicin shekara da kashi 22.1 cikin 100 a shekarar 2025, yayin da tsayin daka mai tsayi ya tabbatar da amincin manufofin kudi tare da rage tsammanin hauhawar farashin kayayyaki.

Ko da yake, ya nuna cewa kalubalen shi ne don karfafa kwanciyar hankali na tattalin arzikin kasa da habaka yanayin tattalin arziki ta hanyar zurfafa gyare-gyare mai fa’ida.

“Akwai bukatar tattalin arziki ya samar da karin ayyukan yi masu inganci da kuma rage talauci a tsakanin al’umma.”

Mukaddashin Daraktan Bankin Duniya a Nijeriya, Taimur Samad ya ce, “Nijeriya ta samu ci gaba mai ban sha’awa don maido da kwanciyar hankali a fannin tattalin arziki, tare da ingantuwar yanayin kasafin kudi, yanzu Nijeriya na da damar inganta adadi da ingancin kashe kudade na ci gaba, kara saka hannun jari kan rayuwar Dan’adam, kariyar zamantakewa, da ababen more rayuwa.

“Rarraba dukiyar al’umma na iya fara kaucewa tsarin da ba a dawwama a baya, a maimakon haka wajen biyan manyan bukatu na ci gaban Nijeriya, ciki har da gwamnati ta taka muhimmiyar rawa wajen samar da muhimman ayyukan gwamnati da kuma zama mai ba da damar ci gaban kamfanoni masu zaman kansu.”