Darussan Koyi Daga Salon Bunkasa Kasa Na Sin

La’akari da kwarewa da kasar Sin ta samu a fannoni daban daban na raya kasa da kyautata zamantakewar al’umma, ciki har da amfani da binciken kimiyya wajen samar da ci gaba, muhimman dabaru ne da ya dace sauran sassan kasa da kasa su yi koyi da su wajen bunkasa nasu bangarorin.

Ko shakka babu kasar Sin ta samarwa duniya da misalin wani tsari mai kunshe da cikakkun manufofi, wadanda gwamnati ke aiwatarwa daki-daki, da salon gudanar da komai a bude cikin adalci, da mayar da hankali ga jin dadi da walwalar al’ummar kasa, da kuma kare martabar al’adun kasa masu dogon tarihi.

• INEC Ta Samar Da Sashen Ƙirƙirarriyar Basira Domin Inganta Harkokin Zaɓe 
• ‘Yansanda Sun Tarwatsa Wuraren Haɗa Jabun Taki A Bauchi, An Cafke Mutum 5

Muna iya cewa, tarin nasarori da kasar Sin ta samu wajen bunkasa tattalin arziki da zamantakewar al’umma ne ya sa sassan al’ummun kasa da kasa ke ta nazari, da koyi, da fatan hadin gwiwa da Sin a turbarsu ta neman raya kai.

A bayyane take cewa Sin ta zuba jari mai dunbin yawa a fannin raya ilimi, da binciken kimiyya, fasaha da kirkire-kirkire, inda aka kashe tarin kudade wajen gina cibiyoyin kyankyashe kyakkyawar basira, kamar jami’o’i, da wuraren gwaje-gwaje wadanda suka taimaka matuka ga cimma manyan burikan kasar.

A fannin raya al’adu da cudanya su da ci gaban zamani ma, kasar Sin ta yi rawar gani, domin kuwa ta samar da salon zamanantar da kasa na musamman mai halayyar kasar Sin, wanda ya zamo wani ginshiki na raya ci gabanta da na daukacin bil’adama baki daya, a halin da ake ciki da ma gadar da shi ga zuri’o’i masu zuwa.

Ko shakka babu, ba wani tsari ko salon ciyar da al’umma gaba da za a iya cewa zai dace dari-bisa-dari da dukkanin sassan duniya bai daya, amma duk da haka, daukacin kasashen duniya za su iya koyi daga kwarewar kasar Sin, da tsawon lokacin da ta shafe tana gwada dabarunta na ci gaba wadanda suka haifar da da mai ido. Yayin da a nasu bangare sassan kasa da kasa ke da damar tsara manufofi daidai da burikansu da yanayin da suke ciki.

Wasu masharhanta na ganin kwarewar da Sin ke samarwa duniya, tamkar sabon zabi ne ga sassa masu fatan gwada wani salo na bunkasa kasashe masu tasowa, wanda ya sabawa na yammacin duniya, don haka sassa daban daban ke kara rungumar manufofi, da shawarwari da Sin ta gabatar na yin tafiya tare, irin su shawarar “ziri daya da hanya daya”, da hadakar BRICS, da dandalin FOCAC na tattauna hadin gwiwar Sin da kasashen Afirka da sauransu. (Saminu Alhassan)